ޝާފިޢު ހާރޫން ވ. ޕްރޮސިކިއުޓަރ ޖެނެރަލް

މަޑަވެލި މެޖިސްޓްރޭޓް ކޯޓުން ޤާނޫނު ނަންބަރު 12/2009 ގެ 47 ވަނަ މާއްދާގެ 6 ހެކި ލިބިފައިވާތީ ކުށް ސާބިތުވާކަމަށް ކަނޑައަޅައި ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 23 ވަނަ މާއްދާގެ (ނ) ގެ ދަށުން 11 އަހަރު ޖަލަށްލުމަށް ޙުކުމްކުރިއެވެ.

2016 ޖަނަވަރީގައި ތުހުމަތުކުރެވޭ ފަރާތް ކުޑަކުއްޖަކު ފަޅުގޯއްޗެއްގެ ތެރެއަށް ގެންގޮސް ގަދަކަމުން ޖިންސީ ޢަމަލު ހިންގި ކަމަށް ދަޢުވާ ކުރެވުނެވެ.

އިސްތިއުނާފުކުރި ފަރާތުން ބުނީ ދަޢުވާގެ ސީޣާގައިވާ ޢަމަލު މާއްދާގައި ނެތްކަމާއި، ދިފާޢީ ހެކިން ހާޒިރުނުކުރިކަމާއި، މެޑިކަލް ރިޕޯޓާއި ފޯން ކޯލް ލޮގާއި ޗެޓް ލޮގަށް ދިފާޢުވުމުގެ ފުރުޞަތު ނުދިންކަމާއި، ޝަފަހީ ހެކި ނެތްކަމާއި، ޤާނޫނާ ޚިލާފަށް ހޯދި ހެކި ބޭނުންކުރިކަމާއި، ކުށް އެކަށީގެންވާ ޝައްކެއްނެތި ސާބިތުނުވާކަމެވެ.

ޤާނޫނު ނަންބަރު 12/2009 ގެ 3 ވަނަ މާއްދާގެ ދަށުން ކުޑަކުއްޖަކާއެކު ޖިންސީ ޢަމަލެއް ހިންގުމުގެ ކުށުން ކުށްވެރިކޮށް 11 އަހަރު ޖަލަށްލުމަށް މެޖިސްޓްރޭޓް ކޯޓުން ކުރި ޙުކުމް، ދަޢުވާގެ ސީޣާއާއި ކުށުގެ ޢަމަލު ދިމާނުވުމާއި، ދިފާޢީ ހެކިން ހާޒިރުނުކުރުމާއި، ހެކިތަކަށް ދިފާޢުވުމުގެ ފުރުޞަތު ނުދިނުމާއި، ހެކީގެ މިންވަރު ފުރިހަމަނުވުމުގެ ސަބަބުން ބާޠިލުވާނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާގެ ނަމާއި ތުހުމަތު ސާފުކޮށް ދީފައިވާކަމާއި، ޢަމަލަކީ ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 3 ވަނަ މާއްދާގެ ދަށުން ތަޖްރީމްކޮށްފައިވާ ޢަމަލެއްކަމާއި، ދިފާޢީ ހެކިން ހާޒިރުނުކުރި ސަބަބު ރިޕޯޓުގައިވާކަމާއި، ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 47 ވަނަ މާއްދާގެ ވަކިވަކި ހެކިތައް ލިބިފައިވާކަމާއި، ފޯން ރެކޯޑު ހޯދީ ކޯޓު އަމުރަކުންކަމާއި، ހެކިތައް ދިމާވާތީ ވާހަކަ ހަދައިގެން ކިޔައިދިން ކަމަށް ބެލެވޭނެ ސަބަބެއް ނެތްކަމެވެ.