2014/HC-DM/01

ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 27 ވަނަ މާއްދާއިން ހަނުހުރުމުގެ ޙައްޤު ނިގުޅައިގަނެވޭތީއާއި، ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 47 ވަނަ މާއްދާގައިވާ ހެކީގެ ނިސްބަތަކީ އެކަށީގެންވާ ޝައްކެއްނެތް މިންގަނޑާ ތަޢާރުޟުވާ މާއްދާއެއް ކަމަށް ބުނެ، އެ ދެ މާއްދާ ބާޠިލުކޮށްދިނުމަށް އެދި ހުށަހެޅި ދުސްތޫރީ މައްސަލައެކެވެ.

ހުށަހެޅި ފަރާތުން ބުނީ ޤާނޫނުއަސާސީގައިވާ އަސާސީ ޙައްޤެއް ޤާނޫނަކުން ނިގުޅައިނުގަނެވޭނެ ކަމަށާއި، ޤާނޫނު ނަންބަރު 12/2009 (ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގެ ބައެއް އަކުރުތަކަކީ ތަފާތު ވަޞީލަތްތަކެއް ނޫންކަމަށާއި، (މ) އަކީ ކުށް ސާބިތުކުރުމަށް ބޭނުންކުރެވޭނެ ކަމެއް ނޫންކަމަށެވެ. ދައުލަތުން ބުނީ ކުޑަކުދިންނާމެދު ކުރެވޭ ޖިންސީ ކުށްތައް ސާބިތުކުރުމުގެ ދަތިތަކާއި މުޖުތަމަޢުގެ ޙައްޤަށް ބަލައި ޙައްޤު ހަނިކުރުން ބޭނުންތެރި ކަމަށެވެ.

ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 27 ވަނަ މާއްދާ (ހަނުހުރުމުގެ ޙައްޤު ނުލިބުން) އަދި 47 ވަނަ މާއްދާ (ހެކީގެ ނިސްބަތް) އަކީ ޤާނޫނުއަސާސީގެ 48 (ނ) އާއި 51 (އ) އާ ޚިލާފު، ބާޠިލު މާއްދާތަކެއްތޯ.

ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 27 ވަނަ މާއްދާއާއި 47 ވަނަ މާއްދާ ބާޠިލު ކަމަށް ކަނޑައަޅާނެ ތަނެއް ނެތް (ދުސްތޫރީ ދަޢުވާ ބާޠިލު)

ޤާނޫނުއަސާސީގެ ޙައްޤުތަކަކީ މުތުލަޤު ޙައްޤުތަކެއް ނޫންކަމާއި، ޤާނޫނު ނަންބަރު 12/2009 (ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 27 ވަނަ މާއްދާއިން ވަކިގޮތަކަށް ބަޔާންދިނުން ލާޒިމު ނުކުރާކަމާއި، ކުޑަކުދިންނަށް ޖިންސީގޯނާ ކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 47 ވަނަ މާއްދާގެ ހެކިތަކަކީ ހަމައެކަނި ބަލައިގަންނަ ހެކި ނޫންކަމާއި ފަނޑިޔާރަށް ހުރިހާ ހެކި ވަޒަންކުރުމުގެ ބާރު ލިބިގެންވާތީ، ދެ މާއްދާވެސް ޣައިރު ދުސްތޫރީ ކަމަށް ނުބެލެވޭ ކަމަށް ކޯޓުން ކަނޑައެޅިއެވެ.