ޕްރޮސިކިއުޓަރ ޖެނެރަލް ވ. ޝަހީބް އިބްރާހީމް

ކްރިމިނަލް ކޯޓުގެ ނަންބަރު 145-J/MA/2020/2627 އަމުރުން، ކުށާ ގުޅުވައިދޭ އެކަށީގެންވާ ހެކި ހުށަހަޅާފައިނުވާތީއާއި، ތަޙްޤީޤީ ބަޔާން ނަގައި ހުށަހަޅާފައިނުވާތީ، ޕާސްޕޯޓް ހިފަހައްޓައި ޝަރުޠުކޮށް ބަންދުން ދޫކޮށްލިއެވެ.

އިތުރު ބަޔަކާ ބައިވެރިވެގެން ކަނޑުމަގުން ދިވެހިރާއްޖެއަށް ގިނަ ޢަދަދެއްގެ މަސްތުވާތަކެތި އެތެރެކޮށް ޓްރެފިކްކުރިކަމުގެ ތުހުމަތުގައި ހައްޔަރުކުރެވި 15 ދުވަހަށް ބަންދުކުރެވުނު ފަރާތެއްގެ ބަންދުގެ މުއްދަތު ހަމަވާތީ، ޝަރީޢަތް ނިމެންދެން ބަންދުގައި ބެހެއްޓުމަށް ފުލުހުން އެދުނެވެ. ކުރީގެ އަމުރުގައި އޭނާގެ ތަޙްޤީޤީ ބަޔާން ނެގުމަށާއި ޕީޖީއާ މަޝްވަރާކުރުމަށް އަންގާފައިވިއެވެ.

ޕްރޮސިކިއުޓަރ ޖެނެރަލް ބުނީ، އަމުރަކީ ޤާނޫނުއަސާސީއާއި ޖިނާއީ އިޖުރާއަތުގެ ޤާނޫނުގެ ބަންދާބެހޭ މާއްދާތަކާ ޚިލާފު އަމުރެއްކަމަށާއި، މަތީ ކޯޓުތަކުގެ ނިންމުންތަކަށް ތަބާވާން ޖެހޭ އުޞޫލާއި ސުޕްރީމް ކޯޓާއި ހައިކޯޓުގެ ސާބިޤާތަކާ ޚިލާފު އަމުރެއްކަމަށެވެ.

މަސްތުވާތަކެތި ދިވެހިރާއްޖެއަށް އެތެރެކޮށް ޓްރެފިކްކުރިކަމުގެ ތުހުމަތުގައި ބަންދުގައި ތިބި ފަރާތެއްގެ ޝަރީޢަތް ނިމެންދެން ބަންދުގައި ބެހެއްޓުމަށް އެދުމުން، ކުށާ ގުޅުވައިދޭ ހެކި ނެތުމާއި ކުރީގެ އަމުރުގައިވާ ތަޙްޤީޤީ ބަޔާން ނުނެގުމުގެ ސަބަބުން ޝަރުޠުކޮށް ދޫކޮށްލި ކްރިމިނަލް ކޯޓުގެ އަމުރު ޤާނޫނާ އެއްގޮތްތޯ.

ދަށުކޯޓުގެ އަމުރު ބާޠިލު، ޝަރީޢަތް ނިމެންދެން ބަންދުގައި ބެހެއްޓުމަށް އަމުރުކުރި

ބަޔާން ނުނެގުނު ސަބަބު ފުލުހުން ސާފުކޮށްދީފައިވާތީ އެއީ އެކަށީގެންވާ ސަބަބެއްކަމަށާއި، 2018/HC-A/286 ތަފާތު ކަމަށާއި، ފުލުހުން ހުށަހެޅި ހެކި ޤަރީނާއިން ތުހުމަތެއް އުފެދޭ މިންވަރު ހާސިލުވާކަމަށާއި، ކުށަކީ ޖިނާއީ ބޮޑު ކުށެއްކަމުން ދޫކޮށްލުމަކީ މުޖްތަމަޢުގެ ސަލާމަތަށް ނުރައްކަލެއް ކަމަށް ނިންމައި، އަމުރު ބާޠިލުކޮށް ޝަރީޢަތް ނިމެންދެން ޖަލުގައި ބަންދުކުރުމަށް އަމުރުކުރިއެވެ.