ޕްރޮސިކިއުޓަރ ޖެނެރަލް ވ. މުޙައްމަދު އަޒްޙަމް ސަޢީދު

ކްރިމިނަލް ކޯޓުން، ތަކެތީގެ ބަރުދަން ޓްރެފިކް މިންގަނޑަށް ނުފެތޭކަމަށާއި ތަޙްޤީޤަށް އެކަށީގެންވާ މުއްދަތު ހޭދަވެފައިވާކަމަށް ބުނެ، 30 ދުވަހަށް ޝަރުޠުތަކާއެކު ތުހުމަތުކުރެވޭ ފަރާތް ބަންދުން ދޫކޮށްލިއެވެ.

މަސްތުވާތަކެތި ބޭނުންކުރުމާއި ގެންގުޅުމާއި ޓްރެފިކްކުރުމުގެ ތުހުމަތުގައި ބަންދުގައި ތިބި ތުހުމަތުކުރެވޭ ފަރާތުގެ ބަންދު 15 ދުވަހަށް އިތުރުކުރުމަށް ފުލުހުން ކްރިމިނަލް ކޯޓަށް އެދުނެވެ. ތުހުމަތުކުރެވޭ ފަރާތުގެ ހަށިގަނޑުންނާއި ކޮޓަރިން ޖުމްލަ 26 ގްރާމްހާ މަސްތުވާތަކެތި ފެނުނުކަމަށް ދައުލަތުން ބުންޏެވެ.

ޕީޖީ ބުނީ އަމުރަކީ ޤާނޫނުއަސާސީގެ 49 އާއި ޖިނާއީ އިޖުރާއަތުގެ ޤާނޫނުގެ 22(ޅ)، 59، 60، 63 ވަނަ މާއްދާތަކާއި ޤާނޫނުއަސާސީގެ 143(ރ) އާ ޚިލާފު އަމުރެއްކަމަށެވެ. ތުހުމަތުކުރެވޭ ފަރާތުން ބުނީ ފެނުނު ތަކެތި އޭނާ ބޭނުންކުރަން ގެންގުޅުނު ތަކެތިކަމަށާއި ބަރުދަން ޓްރެފިކް މިންގަނޑަށް ނުފެތޭކަމަށެވެ.

މަސްތުވާތަކެތި ބޭނުންކުރުމާއި ގެންގުޅުމާއި ޓްރެފިކްކުރުމުގެ ތުހުމަތުގައި ބަންދުގައި ތިބި މީހެއްގެ ބަންދުގެ މުއްދަތު އިތުރުކުރުމަށް ފުލުހުން އެދުނުއިރު، އޭނާ ޝަރުޠުތަކާއެކު ބަންދުން ދޫކޮށްލި ކްރިމިނަލް ކޯޓުގެ އަމުރަކީ ޖިނާއީ އިޖުރާއަތުގެ ޤާނޫނުގެ 59، 60، 63 ވަނަ މާއްދާތަކާއި ޤާނޫނުއަސާސީގެ 49 އަދި 143 ވަނަ މާއްދާތަކާ އެއްގޮތަށް ނެރެފައިވާ އަމުރެއްތޯ؛ އަދި ދަށުކޯޓުގައި އެދިފައިނުވާ ފަރުވާއެއް (ޝަރީޢަތް ނިމެންދެން ބަންދު) ހައިކޯޓުން ދެވިދާނެތޯ.

ދަށުކޯޓުގެ އަމުރު ބާޠިލު؛ ޕީޖީ އެދިއްޖެނަމަ ބަންދާމެދު ކްރިމިނަލް ކޯޓުން އަލުން ގޮތެއް ނިންމަންޖެހޭނެކަމަށް ކަނޑައެޅި

ތުހުމަތަކީ ޖިނާއީ ބޮޑު ކުށެއް ކަމުގައިވާތީއާއި، މުޖުތަމަޢުގެ ސަލާމަތާބެހޭ ސަބަބު އޮތުމުން 60(ރ) ގެ ދަށުން ޝަރުޠުކޮށް ދޫކޮށްލުމުގެ އިޚްތިޔާރު ނެތުމާއި، 63(ބ) ގެ ދަށުން ކަފާލާތުގެ ދަށުން ދޫނުކުރެވޭ ކުށަކަށްވުމާއި، ކުށުގެ ރެކޯޑާއި މަތީ ކޯޓުތަކުގެ ނިންމުންތަކަށް ރިޢާޔަތްނުކުރުމުން އަމުރު ބާޠިލުކުރިއެވެ. ނަމަވެސް ދަށުކޯޓުގައި އެދިފައިނުވާ ފަރުވާއެއްކަމުން ޝަރީޢަތް ނިމެންދެން ބަންދުކުރުމުގެ އަމުރު ހައިކޯޓުން ނުދީ، އެކަން ޝަރީޢަތް ބަލާ ކޯޓަށް ދޫކޮށްލިއެވެ.