ޕްރޮސިކިއުޓަރ ޖެނެރަލް ވ. ޙުސައިން ޠާއިލު

އިތުރަށް ބަންދުގައި ބަހައްޓަންޖެހޭ ސަބަބެއް ނުފެންނަކަމަށް ބުނެ ކްރިމިނަލް ކޯޓުން ބަންދުން ދޫކޮށްލިއެވެ.

ތުހުމަތުކުރެވޭ ފަރާތް އިތުރު ބަޔަކާ ގުޅިގެން މަސްތުވާތަކެތި އެތެރެކޮށް ބޭނުންކޮށް ގެންގުޅެ ވިޔަފާރިކުރާކަމުގެ ތުހުމަތުގައި ބަންދުކުރެވި، ކުޑަކަމުދާތަކެތި ކެނަބިސްއަށް ޕޮޒިޓިވްވެ، ސީނުން ފެނުނު ތަކެތީގެ ބަރުދަނަކީ 30.8634 ގްރާމް ކަމުގައި ވިއެވެ. ފުލުހުން 10 ދުވަހަށް ބަންދުގެ މުއްދަތު އިތުރުކުރުމަށް އެދުނެވެ.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 އާއި ޖިނާއީ އިޖުރާއަތުގެ ޤާނޫނުގެ 22 (ޅ)، 59 އާއި 60 (ށ) އަށް ރިޢާޔަތްނުކޮށް، އަދި ޤާނޫނުއަސާސީގެ 143 (ރ) ގެ މަތީ ކޯޓުތަކުގެ ނިންމުންތަކަށް ތަބާވުމުގެ އުޞޫލާ ޚިލާފަށް ނެރުނު އަމުރެއް ކަމަށެވެ.

މަސްތުވާތަކެތި ބޭނުންކުރުމާއި ގެންގުޅުމާއި ޓްރެފިކްކުރުމުގެ ތުހުމަތުގައި ބަންދުގައި ހުރި ފަރާތެއްގެ ބަންދުގެ މުއްދަތު 10 ދުވަހަށް އިތުރުކުރުމަށް އެދުމުން، ބަންދުގައި ބަހައްޓަންޖެހޭ ސަބަބެއް ނެތްކަމަށް ބުނެ ދޫކޮށްލި ކްރިމިނަލް ކޯޓުގެ އަމުރު ޤާނޫނުއަސާސީގެ 49 އާއި ޖިނާއީ އިޖުރާއަތުގެ ޤާނޫނުގެ 59 އަދި 60 (ށ) އާ އެއްގޮތްތޯ.

ދަށުކޯޓުގެ އަމުރު ބާޠިލު؛ ޕްރޮސިކިއުޓަރ ޖެނެރަލް އެދިއްޖެނަމަ ބަންދާމެދު އަލުން ނިންމާނީ އަޞްލު މައްސަލަ ބަލާ ކޯޓުން

ޓްރެފިކިންގެ ތުހުމަތުގައިވާ މީހަކު ދޫވެފައި ހުރުމަކީ މުޖުތަމަޢުގެ ސަލާމަތަށް ނުރައްކާ އޮތް ކަމަކަށްވާތީ ދަށުކޯޓުގެ ނިންމުން ބަދަލުކުރަންޖެހެއެވެ. ނަމަވެސް މައްސަލަ މިހާރު ޝަރީޢަތަށް ހުށަހެޅިފައިވާތީ ބަންދާމެދު ނިންމަންވާނީ އެ މައްސަލަ ބަލާ ކޯޓުންނެވެ.