އަޙްމަދު ނިޝާމް ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން މުޖުތަމަޢުގެ ސަލާމަތާއި ރައްކާތެރިކަމަށްޓަކައި ތުހުމަތުކުރެވޭ ފަރާތް އިތުރު 15 ދުވަހަށް ކަސްޓޯޑިއަލް ޖަލެއްގައި ބަންދުކުރުމަށް އަމުރުކުރިއެވެ.

މާރާމާރީ ހިންގިކަމުގެ ތުހުމަތުގައި ހައްޔަރުކުރެވުނު ފަރާތެއް ފުރަތަމަ ފަހަރަށް ކްރިމިނަލް ކޯޓުން 10 ދުވަހަށް ބަންދުކޮށް، އެ މުއްދަތު ހަމަވުމުން ފުލުހުން އެދުމުން ދެވަނަ ފަހަރަށް އިތުރު 15 ދުވަހަށް ބަންދުކުރުމަށް އަމުރުކުރިއެވެ.

އިސްތިއުނާފުކުރި ފަރާތުން ބުނީ މާރާމާރީއަކީ ޖިނާއީ ބޮޑު ކުށެއް ނޫންކަމުން ދެވަނަ ފަހަރަށް މުއްދަތު އިތުރުކުރީ ޖިނާއީ އިޖުރާއަތުގެ ޤާނޫނުގެ 60 (ޅ) އާއި، ޤާނޫނުއަސާސީގެ 141 (ރ) ގެ ދަށުން ތަބާވާން ލާޒިމު 2018/HC-A/134 ޤަޟިއްޔާއާ ޚިލާފަށް ކަމަށެވެ.

މާރާމާރީ ހިންގިކަމުގެ ތުހުމަތުގައި ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާގެ (ބ) ގެ ދަށުން ބަންދުކޮށްފައިވާ މީހެއްގެ ބަންދުގެ މުއްދަތު ހަމަވުމުން، ތުހުމަތުކުރެވޭ ކުށަކީ ޖިނާއީ ބޮޑު ކުށެއް ނޫން ޙާލަތުގައި، ދެވަނަ ފަހަރަށް އިތުރު 15 ދުވަހަށް ބަންދުގެ މުއްދަތު އިތުރުކުރުމަކީ ޤާނޫނާ އެއްގޮތް ކަމެއްތޯ.

ދަށުކޯޓުގެ އަމުރު ބާޠިލު

60 (ބ) ގެ ދަށުން ބަންދުކުރެވޭ އެންމެ ދިގު މުއްދަތަކީ 15 ދުވަސް ކަމަށާއި، އޭގެ އިތުރަށް ދެވޭނީ ޖިނާއީ ބޮޑު ކުށެއްގެ ތުހުމަތުގައި ކަމަށާއި، މި ކުށަކީ ޖިނާއީ ބޮޑު ކުށެއް ނޫންތީ ފުރަތަމަ 10 ދުވަހަށްފަހު އިތުރުކުރެވޭނީ 5 ދުވަހަށްވުރެ ދިގުނުވާ މުއްދަތެއް ކަމަށް ކަނޑައަޅާ، 15 ދުވަހަށް އިތުރުކުރި އަމުރު ބާޠިލުކުރެވިއެވެ.