ޕާރލް ހޮލިޑޭސް ޕވޓ ލޓޑ ވ. މުޙައްމަދު ޢަޒުމީ

ސިވިލް ކޯޓުން ދަޢުވާލިބޭ ފަރާތްތަކުގެ ޣައިރު ޙާޟިރުގައި، ކުންފުނީގެ ޤާނޫނީ ޝަޚްޞިއްޔަތު ނިވާފަތްގަނޑެއްގެ ގޮތުގައި ބޭނުންކޮށްގެން މަންފާ ހޯދާފައިވާތީ ކުންފުންޏާއި ޑިރެކްޓަރުން ފަރުދީގޮތުން ޒިންމާވާކަމަށް ކަނޑައަޅައި، ލިބުނު ކުލީގެ ފައިސާ ވެރިފަރާތަށް ދިނުމަށް ޙުކުމްކުރިއެވެ.

ހުޅުމާލޭގައި ޢަޒުމީ ވެރިފަރާތްކަމުގައިވާ ގޯއްޗެއްގެ ޢިމާރާތް، އޭނާގެ ހުއްދައެއް ނެތި ޕާރލް ހޮލިޑޭސް ކުންފުނީގެ ތަނެއް ކަމަށް ދައްކައިގެން އެއާޕޯޓް ކުންފުނިތަކަށް ކުއްޔަށްދީ ކުލި ހޯދިކަމަށް ބުނެ، ކުންފުންޏާއި ޑިރެކްޓަރުންގެ މައްޗަށް އެ ފައިސާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތްތަކުން ބުނީ ޙުކުމަކީ ކޮންޓްރެކްޓާބެހޭ ޤާނޫނާއި ޢަދުލުވެރި ޝަރީޢަތުގެ ޙައްޤާއި 2008/SC-A/09 ގެ އުޞޫލާ ޚިލާފު ޙުކުމެއް ކަމަށާއި، ބިނާކުރުމުގެ ޚަރަދު ކުލިން ހަމަކުރަން އަނގަބަހުން އެއްބަސްވުމެއް ވެފައިވާ ކަމަށެވެ. ރައްދުވާ ފަރާތުން ބުނީ ނުކުތާތައް ސާފުނޫން ކަމަށާއި ދަށުކޯޓުގައި ނުބުނާ ކަންކަން އިސްތިއުނާފުގައި ހުށަހަޅާފައިވާ ކަމަށެވެ.

ކޯޓަށް ޙާޟިރުވުމުގެ އަމުރުތައް ރައްދުވެފައިވާ ދަޢުވާލިބޭ ފަރާތްތަކުގެ ޣައިރު ޙާޟިރުގައި ދަށުކޯޓުން ޙުކުމްކުރުމަކީ ކޯޓަށް މީހުން ޙާޟިރުކުރުމުގެ ޤަވާޢިދާއި ޤާނޫނުއަސާސީގައިވާ ޢަދުލުވެރި ޝަރީޢަތުގެ ޙައްޤާ ޚިލާފު ކަމެއްތޯ؛ އަދި ދަށުކޯޓަށް ހުށަނާޅާ ހުރި ހެއްކާއި ނުކުތާ (އަނގަބަހުން ވެފައިވާ ކަމަށް ބުނާ އެއްބަސްވުމެއް) އިސްތިއުނާފީ މަރުޙަލާގައި ބެލޭނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އަނގަބަހުން ވި އެއްބަސްވުމުގެ ހެއްކެއް ދަށުކޯޓަށް ހުށަނާޅާތީ އިސްތިއުނާފުގައި ބެލޭކަށް ނެތެވެ. ޙާޟިރުވުމުގެ އަމުރުތައް 5 ފަހަރު ރައްދުވެ ޙާޟިރުނުވާތީ ޣައިރު ޙާޟިރުގައި ނިންމުމަކީ ޤަވާޢިދާ އެއްގޮތް ކަމެކެވެ. ޙުކުމް ބިނާކޮށްފައިވަނީ ހުށަހެޅުނު ހެކިތަކުގެ މައްޗަށެވެ.