އެޓޯލް ބެންޑް ޕވޓ ލޓޑ ވ. މޫސާ ޢަބްދުއްރަޙީމް

ސިވިލް ކޯޓުން ދަޢުވާލިބޭ ފަރާތުގެ ޣައިރު ޙާޟިރުގައި، 246,932 ރުފިޔާ 30 ދުވަހުގެ ތެރޭގައި ދެއްކުމަށާއި ދޯނި 20 ދުވަހުގެ ތެރޭގައި ފ. ނިލަންދޫއަށް ގެންގޮސް ޙަވާލުކުރުމަށް ޙުކުމްކުރި.

ގިރިޓީ ދޯނި 2 އަހަރަށް މަހަކު 30,000 ރުފިޔާއަށް ކުއްޔަށް ހިފި އެޓޯލް ބެންޑް ޕވޓ ލޓޑުން 2018 އޮގަސްޓުން ފެށިގެން ކުލި ފުރިހަމައަށް ނުދައްކައި، އިންޖީނުގެ މައްސަލައާ ގުޅިގެން އެއްބަސްވުން ރޫޅާލުމަށް ނޯޓިސް ދިނުމުން، ދޯނީގެ ވެރިފަރާތުން ކުލި، ގެއްލުމުގެ ބަދަލު އަދި ދޯނި ޙަވާލުކުރުމަށް ދަޢުވާކުރި.

އިސްތިއުނާފުކުރި ކުންފުނިން ބުނީ ޚަބަރު ފަތުރާ ވަސީލަތްތަކުން އިޢުލާނުނުކޮށް ޣައިރު ޙާޟިރުގައި ނިންމުމަކީ ޤަވާޢިދުގެ 26، 28 ވަނަ މާއްދާއާއި ޤާނޫނުއަސާސީގެ 42 ވަނަ މާއްދާއާ ޚިލާފު ކަމަށާއި، އެއްބަސްވުމާއި ސިޓީތަކަށް ރިޢާޔަތްނުކޮށް Pacta sunt servanda ގެ މަބްދައާއި ފަނޑިޔާރުންގެ ޤާނޫނުގެ 5(ށ)(1)، (3) އާ ޚިލާފަށް ނިންމި ކަމަށެވެ.

ދަޢުވާލިބޭ ފަރާތް ޣައިރު ޙާޟިރުގައި ސިވިލް ކޯޓުން މައްސަލަ ނިންމުމަކީ ކޯޓަށް މީހުން ޙާޟިރުކުރުމުގައި ޢަމަލުކުރާނެ ގޮތުގެ ޤަވާޢިދާއި ޤާނޫނުއަސާސީގެ 42 ވަނަ މާއްދާއާ ޚިލާފު ކަމެއްތޯ؛ އަދި ދަށުކޯޓުގެ ފަނޑިޔާރު ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) އާ ޚިލާފަށް ޢަމަލުކުރިކަމަށް ބުނާ ޝަކުވާއާއި، ދަށުކޯޓުގައި ދިފާޢު ހުށަހަޅަން ފުރުޞަތު ނުލިބުނު ކަމަށް ބުނާ ނުކުތާ އިސްތިއުނާފުގައި ބަލައިގަނެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުންފުނިން އަޑުއެހުންތަކަށް ޙާޟިރުވެ ވަކީލު މެދުވެރިކޮށް ކޯޓު އަމުރާ ޙަވާލުވެފައިވާތީ އިޢުލާނުކުރަން ނުޖެހޭކަމަށާއި، މަޤްބޫލު ސަބަބެއްނެތި ޙާޟިރުނުވުމުގެ ނަތީޖާގެ ޒިންމާ ކުންފުންޏާ ހަވާލުކަމަށާއި، ފަނޑިޔާރާ ބެހޭ ޝަކުވާއަށް ކާފީ ހެކި ނެތްކަމަށާއި، ދަށުކޯޓުގައި ނުހުށަހެޅި ދިފާޢު އިސްތިއުނާފުގައި ނުބެލޭނެކަމަށް ކަނޑައަޅައި ޙުކުމް ޤާއިމްކުރި.