ޕްރޮސިކިއުޓަރ ޖެނެރަލް ވ. މުޙައްމަދު ފަޞީޙް

ކްރިމިނަލް ކޯޓުން އެސެސްމަންޓް ރިޕޯޓުގެ މައްޗަށް ބިނާކޮށް ޤާނޫނުލްޢުޤޫބާތުގެ 62 ވަނަ މާއްދާގެ ދިފާޢު ލިބޭކަމަށް ބަލައި ދެ ދަޢުވާވެސް ބާޠިލުކޮށް ނިންމިއެވެ.

ދަޢުވާ ލިބޭ ފަރާތުގެ މައްޗަށް ކެނަބިސް ޓްރެފިކްކުރުމާއި ބޭނުންކުރުމުގެ ދަޢުވާ އުފުލުމުން، އޭނާއަކީ ސިކުނޑީގެ އުނިކަމެއް ހުރި މީހެއްކަމަށް ބުނެ ދިފާޢު ހުށަހަޅައި، ކޯޓުގެ އަމުރަކުން ސައިކޭޓްރިސްޓެއް އެސެސްމަންޓެއް ހަދައި ހުށަހެޅިއެވެ.

ދައުލަތުން ބުނީ ނިންމުން ބިނާކޮށްފައިވަނީ ހަމައެކަނި ނާފުރިހަމަ އެސެސްމަންޓް ރިޕޯޓުގެ މައްޗަށް ކަމަށާއި 2023/HC-B12/6 ގައިވާ މިންގަނޑު ފުރިހަމަނުވާ ކަމަށެވެ؛ ރައްދުވާ ފަރާތުން އިޖުރާއީ ގޮތުން ބުނީ ބާޠިލްކުރެވުނު އިސްތިއުނާފެއް އަލުން ހުށަނާޅޭނެކަމަށާއި ދަށުކޯޓުގައި ނުބުނާ ނުކުތާ ހައިކޯޓުގައި ނުބެލޭނެކަމަށެވެ.

ސައިކޭޓްރިސްޓެއްގެ އެސެސްމަންޓް ރިޕޯޓުގެ މައްޗަށް ބިނާކޮށް، ޤާނޫނުލްޢުޤޫބާތުގެ 62 ވަނަ މާއްދާގެ ދިފާޢު (ދަޢުވާ ލިބިގަތުމަށާއި ޙުކުމް ބަލައިގަތުމަށް ނުކުޅެދުން) ލިބޭކަމަށް ބަލައި މަސްތުވާތަކެތީގެ ދަޢުވާތައް ކުރިއަށް ނުގެންދެވޭނެކަމަށް ކްރިމިނަލް ކޯޓުން ނިންމުން ރަނގަޅުތޯ؛ އަދި ހައިކޯޓުގެ ގަވާއިދުގެ 48 ވަނަ މާއްދާގެ ދަށުން ބާޠިލްކުރެވުނު ޝަރީޢަތުގެ ކުރިން ހުށަހަޅާ ހުށަހެޅުމުގެ އިސްތިއުނާފެއް އަލުން ހުށަހެޅިދާނެތޯ.

ދަށުކޯޓުގެ ނިންމުންތައް ބާޠިލު؛ އެގްޒެމިނޭޝަން ފުރިހަމަކުރުމަށްފަހު އަލުން ގޮތެއް ކަނޑައަޅަން ފޮނުވި

ގަވާއިދުގެ (ޅ) ގެ އިސްތިސްނާ ހަމައެކަނި ބަންދު އަމުރުތަކަށް ކަމުން އަލުން ހުށަހެޅުން ޞައްޙައެވެ؛ އެއް ސެޝަނަކުން ހެދި، ފޮލޯއަޕް ނުހެދި ރިޕޯޓަކީ ފުރިހަމަ އެގްޒެމިނޭޝަނެއްކަމާމެދު ސުވާލު އުފެދޭ ރިޕޯޓަކަށްވާތީ އޭގެ މައްޗަށް ކުރި ނިންމުން ޞައްޙައެއް ނޫނެވެ.