ޕްރޮސިކިއުޓަރ ޖެނެރަލް ވ. ޢަބްދުލްބާސިޠު މުޙައްމަދު

ކްރިމިނަލް ކޯޓުން ސައިކޮލޮޖިސްޓާ ސުވާލުކުރުމަށްފަހު، ދަޢުވާ ލިބިގަތުމަށް ނުކުޅެދުމުގެ ދިފާޢު ލިބިގެންވާ ކަމަށާއި ދަޢުވާ މައުޟޫޢީގޮތުން ކުރިއަށް ނުގެންދެވޭނެ ކަމަށް ނިންމިއެވެ.

ޓެރަރިޒަމްގެ ޢަމަލެއް ކުރަން އުޅުމުގެ ދަޢުވާ ކުރެވުނު ފަރާތުން ދަޢުވާ ބަލައިގަތުމަށް ކުޅެދޭތޯ ބެލުމަށް މެޑިކަލް އެގްޒަމިނޭޝަނަށް އެދުމުން ކްރިމިނަލް ކޯޓުން އެއްފަހަރަށްވުރެ ގިނައިން އަމުރުކުރި ނަމަވެސް އެއްވެސް އަމުރެއް ތަންފީޛު ނުވެ، އާއިލާއިން ސައިކޮލޮޖިސްޓަކު ލައްވާ ހެދި އެސެސްމަންޓެއް ކޯޓަށް ހުށަހެޅުނެވެ.

ދައުލަތުން ބުނީ ނިންމުން ބިނާކުރީ ހަމައެކަނި ސައިކޮލޮޖިސްޓުގެ ކްލިނިކަލް އެސެސްމަންޓަށް ކަމަށާއި، ފަނޑިޔާރުގެ އޮބްޒަރވޭޝަނަށް ރިޢާޔަތްނުކުރި ކަމަށާއި، ދިފާޢުގެ (ށ) ގެ ދަށުން ފަރުވާދޭ މަރުކަޒަކަށް ފޮނުވަން ނުބެލި ކަމަށެވެ؛ ދިފާޢުން ބުނީ ބުރަ މަދަނީ މިންގަނޑުން އަދާކުރެވިފައިވާ ކަމަށާއި، ފަނޑިޔާރަށް ދެނެނުގަނެވޭ ކަންކަން ޚަބީރެއްގެ ރިޕޯޓުން ދެނެގަންނަ ކަމަށާއި، ދައުލަތުގެ ބެލުމުގައިހުރި މީހެއްގެ އަމުރު ތަންފީޛު ނުކުރީ ދައުލަތުގެ އިހުމާލުން ކަމަށެވެ.

ދަޢުވާ ލިބިގަތުމަށް ނުކުޅެދުމުގެ ދިފާޢު (ޤާނޫނުލްޢުޤޫބާތު) ދަޢުވާލިބޭ ފަރާތަށް ލިބިގެންވާ ކަމަށް ކަނޑައަޅައި ދަޢުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމީ، ކޯޓު އަމުރާ އެއްގޮތަށް މެޑިކަލް އެގްޒަމިނޭޝަނެއް ނުހަދައި، އާއިލާއިން ހެދި ސައިކޮލޮޖިސްޓެއްގެ އެސެސްމަންޓަށް ބުރަވެގެން ކަމުން އެ ނިންމުން ޤާނޫނާ އެއްގޮތްތޯ؛ އަދި މެޑިކަލް އެގްޒަމިނޭޝަނުގެ ޝަރުޠުތަކާއި، ދިފާޢު ސާބިތުކުރުމުގެ ބުރައާއި މިންގަނޑަކީ ކޮބައިތޯ.

ދަށުކޯޓުގެ ނިންމުން ބާޠިލު؛ މެޑިކަލް އެގްޒަމިނޭޝަނެއް ހެދުމަށްފަހު އަލުން ގޮތެއް ނިންމުމަށް ފޮނުވި

ހައިކޯޓުން ބުނީ ހުށަހެޅުނު ރިޕޯޓަކީ ކޯޓު އަމުރެއްގެ ދަށުން ހެދި ރިޕޯޓެއް ނޫން ކަމަށާއި، ސައިކޮލޮޖިސްޓަކީ ސިކުނޑީގެ ބައްޔެއް ނިންމުމުގެ ފަންނީ ގާބިލުކަން ހުރި މީހެއް ކަމާމެދު ސުވާލު އުފެދޭ ކަމަށާއި، އަސާސީ ޙައްޤުތަކާ ގުޅުންހުރި އިޖުރާއަތު ޤާނޫނާ ޚިލާފަށް ތައްޔާރުކުރި ރިޕޯޓަކަށް ބިނާކުރި ނިންމުން ބަލައިނުގަނެވޭ ކަމަށާއި، ދެފަރާތަށްވެސް ބުރަ އަދާކުރެވިފައި ނުވާ ކަމަށާއި، ދައުލަތާއި ކަރެކްޝަނަލް ސަރވިސްއިން ކޯޓު އަމުރު ތަންފީޛު ނުކުރުމަކީ ޤާނޫނީ ޢުޒުރެއް ނެތް ކަމެއް ކަމަށެވެ.