ޕްރޮސިކިއުޓަރ ޖެނެރަލް ވ. އިބްރާހީމް ޝަމީމް

ސަރުކާރުގެ ކަމާބެހޭ އިދާރާއެއްގެ ރަސްމީ ލިޔުމެއް ހުށަނާޅާތީ، A/17-N-HC/2019 ގެ ނިންމުމަށް ރިޢާޔަތްކޮށް، ޖިނާއީ އިޖުރާއާތުގެ ޤާނޫނުގެ 120(ނ) ގެ ދަށުން ދަޢުވާ ބެލޭނެ ތަނެއް ނެތްކަމަށް ކްރިމިނަލް ކޯޓުން ނިންމިއެވެ.

ތުހުމަތުކުރެވޭ ފަރާތުގެ މައްޗަށް ޤާނޫނު ނަންބަރު 12/2009 ގެ 9 ވަނަ މާއްދާގެ ދަށުން ދަޢުވާކުރިއިރު، އަނިޔާ ލިބުނު ކަމަށްބުނާ ފަރާތަކީ 18 އަހަރު ފުރިފައިވާ ފަރާތެކެވެ. ބުއްދީގެ ތަޞައްރުފު ނުފުދޭކަން ސާބިތުކުރުމަށް ދައުލަތުން ހުށަހެޅީ އަމިއްލަ މުއައްސަސާއެއްގެ ސައިކޮލޮޖިކަލް ރިޕޯޓެކެވެ.

ޕްރޮސިކިއުޓަރ ޖެނެރަލް ބުނީ ސައިކޮލޮޖިކަލް ރިޕޯޓު ހުށަހަޅާފައިވާއިރު އެއީ ރަސްމީ ލިޔުމެއްކަން ނޭނގޭކަމަށް ކަނޑައެޅުމަކީ ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 60 ވަނަ މާއްދާއާ ޚިލާފު ކަމަށެވެ. ދިފާޢުން ބުނީ A/17-N-HC/2019 ގައި ބުނާ ފަދަ ލިޔުމެއް ހުށަނާޅާ ކަމަށެވެ.

18 އަހަރު ފުރިފައިވާ ފަރާތަކީ ބުއްދީގެ ތަޞައްރުފު ނުފުދޭ ކުއްޖެއްކަން ސާބިތުކުރުމަށް ދައުލަތުން ހުށަހެޅި ސައިކޮލޮޖިކަލް ރިޕޯޓަކީ ޤާނޫނު ނަންބަރު 12/2009 ގެ 60 ވަނަ މާއްދާގެ (ށ) ގެ ދަށުން ބޭނުންވާ ސަރުކާރުގެ ރަސްމީ ލިޔުމެއްތޯ، އަދި އެފަދަ ލިޔުމެއް ނެތި ދަޢުވާ ބެލޭނެ ތަނެއް ނެތްކަމަށް ކްރިމިނަލް ކޯޓުން ނިންމުން ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

A/17-N-HC/2019 ގައި ކަނޑައަޅާފައިވާ ގޮތުގެ މަތިން ސަރުކާރުގެ ރަސްމީ ލިޔުމެއް ނުވަތަ ސަރުކާރު ޤަބޫލުކުރާ ލިޔުމެއް ހުށަހަޅަންޖެހޭއިރު، ރިޕޯޓު ހެދި މުއައްސަސާ ސަރުކާރުން ބަލައިގަނެފައިވާކަން ދައްކާ ލިޔުމެއް ހުށަނާޅާތީ، ދަށުކޯޓުގެ ނިންމުމަށް ބަދަލު ގެންނަންޖެހޭ ސަބަބެއް ނެތެވެ.