ޕްރޮސިކިއުޓަރ ޖެނެރަލް ވ. ޢަލީ ސަޢުދު

ށ. ފޭދޫ މެޖިސްޓްރޭޓް ކޯޓުން ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގައިވާ މިންވަރަށް ހެކި ނުލިބޭތީ ޤާނޫނުއަސާސީގެ 51 (އ) އަށް ބިނާކޮށް ދަޢުވާ ސާބިތުނުވާކަމަށް ޙުކުމްކުރިއެވެ.

ނަފްސާނީ ނުކުޅެދުންތެރިކަމެއް ހުރި ކަމަށް ބުނާ، 18 އަހަރު ފުރިފައިވާ ކުއްޖަކާއެކު ޖިންސީ ޢަމަލެއް ހިންގިކަމުގެ ތުހުމަތުގައި ޤާނޫނު ނަންބަރު 12/2009 ގެ 3 (ނ) އާއި 60 (ށ) ގެ ދަށުން ދައުލަތުން ދަޢުވާ ކުރިއެވެ. ތުހުމަތުކުރެވޭ ފަރާތް ޝަރީޢަތުގައި ދަޢުވާއަށް އިންކާރުކުރިއެވެ.

ޕްރޮސިކިއުޓަރ ޖެނެރަލް ބުނީ ތަޙްޤީޤުގައި ދިން އިޢުތިރާފަކީ ހަރުދަނާ ޤަރީނާއެއްކަމަށް 2009/SC-A/18 އާއި 2012/HC-A/14 ގައި ކަނޑައަޅާފައިވާއިރު އޭގެ ރިޢާޔަތް ނުކުރި ކަމާއި، ރިޕޯޓުގެ ޞައްޙަކަމާބެހޭ 2012/HC-A/129 ގެ އުޞޫލު ތަބާނުވި ކަމާއި، 2014/HC-DM/01 ގެ ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގެ އުޞޫލު ގޯސްކޮށް މާނަކުރި ކަމެވެ.

ޤާނޫނު ނަންބަރު 12/2009 ގެ 3 (ނ) ގެ ދަށުން ކުޅަ ކުޑަކުއްޖަކާއެކު ޖިންސީ ޢަމަލެއް ހިންގުމުގެ ދަޢުވާ ސާބިތުނުވާކަމަށް ކަނޑައެޅި މެޖިސްޓްރޭޓް ކޯޓުގެ ޙުކުމް، ތަޙްޤީޤުގައި ދިން އިޢުތިރާފާއި ކުއްޖާގެ ކިޔައިދިނުމުގެ މައްޗަށް ބިނާވާ ހެކި، އެ ޤާނޫނުގެ 47 ވަނަ މާއްދާގެ ހެކީގެ ނިސްބަތަށް ބަލާއިރު ޞައްޙަތޯ؛ އަދި 18 އަހަރު ފުރިފައިވާ ފަރާތަކާމެދު 60 (ށ) ގެ ދަށުން ދަޢުވާ ކުރިއަށް ގެންދެވޭނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ބުއްދީގެ ތަޞައްރުފު ނުފުދޭކަން ސާބިތުކުރާ ރަސްމީ ލިޔުމެއް ހުށަނާޅާތީ 60 (ށ) ގެ ދަށުން ދަޢުވާ ކުރިއަށް ނުގެންދެވޭނެކަމާއި، ފުލުހާއި ކައުންސެލަރުގެ ހެކިބަހަކީ ކުއްޖާގެ ކިޔައިދިނުމަށް ބިނާވާ ހެކި ކަމާއި، މަންޒަރު ދުށް ހެކިވެރިޔާގެ ހެކިބަހުގައި ފުށުއެރުންތައް ހުރުމުން ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގެ ނިސްބަތަށް ހެކި ނުލިބޭތީ ދަށުކޯޓުގެ ޙުކުމް ޤާއިމުކުރިއެވެ.