މުޙައްމަދު އާދަމް ވ. ޕްރޮސިކިއުޓަރ ޖެނެރަލް

ރ. މަޑުއްވަރީ މެޖިސްޓްރޭޓް ކޯޓުން އޭނާގެ އިޢުތިރާފާއި ދައުލަތުގެ ހެކި ޤަރީނާއަށް ބަލައި ކުށް ސާބިތުވާކަމަށް ކަނޑައަޅައި، 2009/12 ގެ 9 (ހ) އާއި (ށ) ގެ ދަށުން 15 އަހަރުގެ ޖަލު ޙުކުމް ކުރިއެވެ.

އިސްތިއުނާފުކުރި ފަރާތް 2013 އިން ފެށިގެން ތަފާތު ދުވަސްތަކުގައި އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު ޖިންސީ ޢަމަލު ހިންގިކަމަށް ދަޢުވާ ކުރެވުނެވެ؛ އޭނާ ދަޢުވާއަށް އިންކާރުކުރިއެވެ.

އިސްތިއުނާފުކުރި ފަރާތުން ބުނީ ފެމިލީ އެންޑް ޗިލްޑްރަން ސަރވިސް ސެންޓަރުގެ ރިޕޯޓަކީ 47 (ހ) ގެ ރަސްމީ ލިޔުމެއް ނޫން ކަމަށާއި، ކުއްޖާގެ ބަޔާން ނަގާފައިވަނީ ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 48 ވަނަ މާއްދާއާ ޚިލާފަށް ކަމަށާއި، ހެކިތަކުގައި ތަޢާރުޟު ހުރި ކަމަށާއި، 2014/HC-DM/01 ގެ އުޞޫލާއި އެކަށީގެންވާ ޝައްކެއްގެ އުޞޫލާ ޚިލާފަށް ނިންމި ކަމަށާއި، ދިފާޢަށް ވަގުތާއި ވަސީލަތް ނުލިބުނު ކަމަށެވެ.

ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 9 ވަނަ މާއްދާގެ ދަށުން އިތުބާރުކުރެވޭ މަޤާމެއްގައި ހުރެ ކުޑަކުއްޖަކާ ޖިންސީ ޢަމަލު ހިންގުމުގެ ކުށުގައި 15 އަހަރުގެ ޖަލު ޙުކުމްކުރުމަށް، އެ ޤާނޫނުގެ 47 ވަނަ މާއްދާގައިވާ 5 ބާވަތުގެ ހެކި ހަމަވެ ދަޢުވާ އެކަށީގެންވާ ޝައްކެއް ނެތި ސާބިތުވިތޯ.

ދަށުކޯޓުގެ ޙުކުމް ބާޠިލު

ހުށަހެޅި ހެކިތަކަކީ ހުރިހާ ހެއްކެއް ކުއްޖާ ބުނި ބުނުމަށް ބިނާވާ އެއް ބާވަތެއްގެ ހެކި ކަމަށާއި، ޢަމަލު ފެނުނު ހެކިއެއް ނުވަތަ މެޑިކޯ ލީގަލް ރިޕޯޓެއް ނެތް ކަމަށާއި، ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގެ 5 ބާވަތުގެ ހެކި ނުލިބޭތީ ދަޢުވާ އެކަށީގެންވާ ޝައްކެއް ނެތި ސާބިތުނުވާ ކަމަށެވެ.