ޕްރޮސިކިއުޓަރ ޖެނެރަލް ވ. ފާޠިން ޙުސައިން

ނައިފަރު މެޖިސްޓްރޭޓް ކޯޓުން އިޢުތިރާފުގެ މައްޗަށް ޒިނޭގެ ކުށުން ކުށްވެރިކޮށް 100 އެތިފަހަރުން ޙައްދު ޖެހުމާއެކު 1 އަހަރަށް ގޭބަންދުކުރުމަށް ޙުކުމްކުރިއެވެ.

ދަޢުވާލިބޭ ފަރާތް ހޮސްޕިޓަލުގައި ވިހެއި ކުއްޖާއަކީ ޒިނޭކޮށްގެން ލިބުނު ކުއްޖެއްކަމަށް އިބްތިދާއީ އަޑުއެހުމުގައި އިޢުތިރާފުވުމުން ދައުލަތުން ޒިނޭގެ ދަޢުވާ އުފުލިއެވެ. ސުޕްރީމް ކޯޓުގެ 2015/14/SC ސަރކިއުލަރގެ ދަށުން ޙުކުމުގެ ޞައްޙަކަން ކަނޑައެޅުމަށް ޕްރޮސިކިއުޓަރ ޖެނެރަލް މައްސަލަ ހައިކޯޓަށް ހުށަހެޅިއެވެ.

ޕްރޮސިކިއުޓަރ ޖެނެރަލް އެދުނީ އިޢުތިރާފު ޞައްޙަކަމާއި، ދަޢުވާލިބޭ ފަރާތަށް ޤާނޫނުއަސާސީގެ ޙައްޤުތައް ލިބިދީފައިވާކަމާއި، ޙައްދު ޖެހުން މަނާކުރާ ސަބަބެއް ނެތްކަން ކަށަވަރުކޮށްދިނުމަށެވެ. ދަޢުވާލިބޭ ފަރާތުން ހައިކޯޓުގައި ބުނީ ޒިނޭއަކީ ކޮބައިކަން އެނގިގެން އިޢުތިރާފުވީކަމަށާއި ވަކީލެއް ނެތި ކުރިއަށް ދިއުމަށް އެދުނުކަމަށެވެ.

ޒިނޭކުރިކަމަށް ދަޢުވާލިބޭ ފަރާތް ޝަރީޢަތުގައި ވި އިޢުތިރާފުގެ މައްޗަށް ބިނާކޮށް 100 އެތިފަހަރުގެ ޙައްދާއި 1 އަހަރުގެ ގޭބަންދު ކަނޑައެޅި މެޖިސްޓްރޭޓް ކޯޓުގެ ޙުކުމަކީ ނިހާއީ ޙުކުމެއްގެ ގޮތުގައި ޞައްޙަ ޙުކުމެއްތޯ؛ އިޢުތިރާފު ޞައްޙަތޯ، ދަޢުވާލިބޭ ފަރާތަށް ޤާނޫނުއަސާސީގެ ޙައްޤުތައް ލިބިދީފައިވޭތޯ، އަދި ޙައްދު ޖެހުމަށް މަނާކުރާ ސަބަބެއް ހުރިތޯ.

ދަށުކޯޓުގެ ޙުކުމް ޞައްޙަކަމަށް ކަނޑައެޅި

ދަޢުވާލިބޭ ފަރާތަށް ޤާނޫނުއަސާސީގެ 51 ވަނަ މާއްދާގެ ޙައްޤުތައް ލިބިދީފައިވާކަމާއި، އިޢުތިރާފަކީ ބާލިޣުވެ ހަމަބުއްދީގައި އަމިއްލަ އިޚްތިޔާރުގައި ވި އިޢުތިރާފެއްކަމާއި، އޭގެން ރުޖޫޢަވެފައި ނުވާކަމާއި، ފުރަތަމަ ފަހަރުކަމަށް ރިޢާޔަތްކޮށް އަދަބު ކަނޑައަޅާފައިވާތީ ޙުކުމް ޞައްޙަކަމަށް ކަނޑައެޅިއެވެ.