ޕްރޮސިކިއުޓަރ ޖެނެރަލް ވ. ޙައްވާ ރައިނާ

މެޖިސްޓްރޭޓް ކޯޓުން އިޢުތިރާފުގެ މައްޗަށް ކުށް ސާބިތުކޮށް، ފުރަތަމަ ފަހަރު ކަމުން ޖިންސީ ކުށުގެ ޤާނޫނުގެ 27 (ށ) ގެ ދަށުން 100 އެތިފަހަރުގެ ޙައްދާއި 1 އަހަރުގެ ގޭބަންދަށް ޙުކުމްކުރިއެވެ.

ކާވެނިން ބޭރުން ދަރިއަކު ވިހެއުމާ ގުޅިގެން ތުހުމަތުކުރެވޭ ފަރާތް ތަޙްޤީޤުގައާއި ޝަރީޢަތުގައި ޒިނޭގެ ކުށަށް އިޢުތިރާފުވުމުން ދައުލަތުން ދަޢުވާކުރި މައްސަލައެކެވެ.

ޕީޖީއިން އެދުނީ އިޢުތިރާފު ޞައްޙަކަމާއި، ޤާނޫނުއަސާސީގެ ޙައްޤުތައް ދީފައިވާކަމާއި، ޙައްދު ޖެހުން މަނާކުރާ ސަބަބެއް ނެތްކަން ކަށަވަރުކޮށްދިނުމަށެވެ. ތުހުމަތުކުރެވޭ ފަރާތުން ބުނީ ތުހުމަތު އަންގައި، ދިފާޢަށް ވަގުތާއި ވަސީލަތް ދީފައިވާ ކަމަށާއި ވަކީލަކަށް އެދިފައި ނުވާ ކަމަށާއި، އިޢުތިރާފުވީ އަމިއްލަ އިޚްތިޔާރުގައި ކަމަށެވެ.

ޒިނޭގެ ކުށަށް ޝަރީޢަތުގައި ވި އިޢުތިރާފުގެ މައްޗަށް ކުށް ސާބިތުކޮށް ޙައްދު ކަނޑައެޅި މެޖިސްޓްރޭޓް ކޯޓުގެ ޙުކުމް ޞައްޙަތޯ (ސުޕްރީމް ކޯޓުގެ 2015/14/SC ސަރކިއުލަރގެ ދަށުން ޕީޖީ ހުށަހެޅި ޞައްޙަކަން ކަށަވަރުކުރުމުގެ މައްސަލަ).

ދަށުކޯޓުގެ ޙުކުމް ޞައްޙަކަމަށް ކަނޑައެޅި

ޤާނޫނުއަސާސީގެ 51 ވަނަ މާއްދާގެ ޙައްޤުތައް ދީފައިވާތީއާއި، އިޢުތިރާފުގެ ޝަރުޠުތައް ފުރިހަމަވެ ރުޖޫޢުވެފައި ނުވާތީއާއި، އަދަބު ކަނޑައަޅާފައިވަނީ ފުރަތަމަ ފަހަރަށް ރިޢާޔަތްކޮށް ޤާނޫނާ އެއްގޮތަށް ކަމުން ޙުކުމް ޞައްޙަކަމަށް ކަނޑައެޅިއެވެ.