ޕްރޮސިކިއުޓަރ ޖެނެރަލް ވ. އިބްރާހީމް މޫސާ

ށ. ފޯކައިދޫ މެޖިސްޓްރޭޓް ކޯޓުން، ޤާނޫނުއަސާސީގެ 51 ވަނަ މާއްދާގެ (އ) ގެ މިންވަރަށް ހެކި ނުލިބޭތީ ދަޢުވާ ސާބިތުނުވާކަމަށް ޙުކުމްކުރިއެވެ.

ތުހުމަތުކުރެވޭ ފަރާތާ އެކު ދިރިއުޅޭ ކުއްޖަކާ މެދު 2012 ވަނަ އަހަރުން ފެށިގެން ޖިންސީ ޢަމަލު ހިންގިކަމަށް ބުނެ، ޤާނޫނު ނަންބަރު 12/2009 ގެ 9 ވަނަ މާއްދާގެ ދަށުން އިތުބާރުހިފޭ މަޤާމެއްގައި ހުރެ ކުޑަކުއްޖަކާ މެދު ޖިންސީ ޢަމަލެއް ހިންގުމުގެ ދަޢުވާ ކުރިއެވެ. ތުހުމަތުކުރެވޭ ފަރާތުން ދަޢުވާއަށް އިންކާރުކުރިއެވެ.

ޕްރޮސިކިއުޓަރ ޖެނެރަލް ބުނީ ކުށް ސާބިތުކުރުމަށް ބޭނުންވާ މިންވަރަށް ހެކި ލިބިފައިވާއިރު އެކަމަށް ރިޢާޔަތްނުކޮށް ނިންމި ކަމަށެވެ. އިސްތިއުނާފު ރައްދުވާ ފަރާތުން ބުނީ ކުއްޖާގެ ބަޔާން ތަޙުޤީޤަށް ނަގާފައިވަނީ ޤާނޫނު ނަންބަރު 12/2009 ގައިވާ އުޞޫލާ ޚިލާފަށް ކަމަށެވެ.

ޤާނޫނު ނަންބަރު 12/2009 ގެ 9 ވަނަ މާއްދާގެ ދަށުން އިތުބާރުހިފޭ މަޤާމެއްގައި ހުރެ ކުޑަކުއްޖަކާ މެދު ޖިންސީ ޢަމަލެއް ހިންގުމުގެ ދަޢުވާ ސާބިތުނުވާކަމަށް މެޖިސްޓްރޭޓް ކޯޓުން ނިންމީ، ޤާނޫނުއަސާސީގެ 51 ވަނަ މާއްދާގެ (އ) ގައިވާ މިންވަރަށް ހެކި ލިބިފައިވާއިރު އެކަމަށް ރިޢާޔަތްނުކޮށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ލޮލަށް ފެނުނު ހެކިން ދުށީ ބައްދާލި ޢަމަލެއް ކަމަށާއި، އެކަނި އެ ޢަމަލަކީ ޖިންސީ ޢަމަލެއް ކަމަށް ނުބެލެވޭނެ ކަމަށާއި، އެއް ހެކިވެރިއެއްގެ ބަޔާން ނެގީ އެތައް އަހަރެއް ފަހުން ކަމަށާއި، ކުއްޖާގެ ބަޔާނުގައި ޢަމަލު ހިންގި ވަގުތެއް ނެތް ކަމަށާއި، ކުއްޖާއާ ބެހޭ ރިޕޯޓުގެ ޞައްޙަކަން ކަށަވަރުކޮށްފައި ނުވާ ކަމަށް ކޯޓަށް ފެނުނެވެ. އެހެންކަމުން ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގެ މިންވަރަށް ނުވަތަ ޤާނޫނުއަސާސީގެ 51 ވަނަ މާއްދާގެ (އ) ގެ މިންވަރަށް ދަޢުވާ ސާބިތުނުވެއެވެ.