ޕްރޮސިކިއުޓަރ ޖެނެރަލް ވ. ޢާއިޝަތު ރިޒްނާ

ކްރިމިނަލް ކޯޓުން ޝަރީޢަތުގެ މަޖިލީހުގައި ވެފައިވާ އިޢުތިރާފުގެ މައްޗަށް ކުށްވެރިކޮށް، ޖިންސީ ކުށުގެ ޤާނޫނުގެ 27 ވަނަ މާއްދާގެ ދަށުން 100 އެތިފަހަރުން ޙައްދު ޖެހުމާއެކު 2 އަހަރު ގޭގައި ބަންދުކުރުމަށް ޙުކުމްކުރި.

ދަޢުވާލިބޭ ފަރާތް ކައިވެންޏަކާ ނުލައި ބަލިވެ ރިހެބިލިޓޭޝަން ސެންޓަރުގައި ހުއްޓާ ކުއްޖަކު ވިހާފައިވާތީ، އެކުއްޖާއަކީ ޒިނޭކުރުމުގެ ސަބަބުން ލިބުނު ކުއްޖެއްކަމަށް ބުނެ ޒިނޭކުރިކަމަށް އިޢުތިރާފުވުމުން، ދައުލަތުން ޒިނޭގެ ދަޢުވާ ކުރި.

ޕްރޮސިކިއުޓަރ ޖެނެރަލް ހައިކޯޓަށް ހުށަހެޅީ ސުޕްރީމް ކޯޓުގެ ސަރކިއުލަރގެ ދަށުން، އިޢުތިރާފު ޞައްޙަކަމާއި، ޤާނޫނުއަސާސީގެ ޙައްޤުތައް ލިބިދީފައިވާކަމާއި، ޙައްދު ޖެހުން މަނާކުރާ ސަބަބެއް ނެތްކަން ކަށަވަރުކޮށްދިނުމަށް އެދި.

ޒިނޭކުރުމުގެ ކުށަށް ދަޢުވާލިބޭ ފަރާތް ވެފައިވާ އިޢުތިރާފުގެ މައްޗަށް ކްރިމިނަލް ކޯޓުން ކުށްވެރިކޮށް، 100 އެތިފަހަރުގެ ޙައްދާއި 2 އަހަރުގެ ގޭބަންދަށް ކުރި ޙުކުމަކީ (އިސްތިއުނާފު ނުކުރެވި ހުރި ޙުކުމެއްގެ ގޮތުގައި ސުޕްރީމް ކޯޓުގެ ސަރކިއުލަރގެ ދަށުން ހުށަހެޅުމުން) ޞައްޙަ ޙުކުމެއްތޯ؛ އިޢުތިރާފު ޞައްޙަތޯ، ޤާނޫނުއަސާސީގެ ޙައްޤުތައް ލިބިދީފައިވޭތޯ، ޙައްދު ޖެހުން މަނާކުރާ ސަބަބެއް އޮތްތޯ.

ދަށުކޯޓުގެ ޙުކުމް ޞައްޙަކަމަށް ކަނޑައަޅައި ޤާއިމްކުރި

އިޢުތިރާފަކީ ބާލިޣުވެ ހަމަބުއްދީގައި އަމިއްލަ އިޚްތިޔާރުގައި ވެފައިވާ، ރުޖޫޢަ ނުވާ އިޢުތިރާފެއްކަމާއި، ޤާނޫނުއަސާސީގެ 51 ވަނަ މާއްދާގެ ޙައްޤުތައް ލިބިދީފައިވާކަމާއި، ޙައްދު މަނާކުރާ ސަބަބެއް ނެތްކަމަށް ހައިކޯޓަށް ފެނުނީތީ ޙުކުމް ޞައްޙަކަމަށް ކަނޑައެޅި.