މުޙައްމަދު ވަޙީދު ވ. ސިލިންކޯ އިންޝުއަރެންސް ކޮމްޕެނީ ޕވޓ ލޓޑ

ސިވިލް ކޯޓުން ނިންމީ، ދޯނި ބެލެހެއްޓުމަށް މީހަކު ހުރިކަން ސާބިތުވާ ކާފީ ހެއްކެއް ދަޢުވާކުރާ ފަރާތުން ހުށަނާޅާތީ، އެއީ ޕޮލިސީއާ ޚިލާފު ޢަމަލެއްކަމުން އިންޝުއަރެންސް ފައިސާ ނަގައިނުދެވޭނެ ކަމަށެވެ.

އިންޝުއަރކޮށްފައިވާ 'ސާރިޔާ' ދޯނި 17 ޖުލައި 2015 ގެ ރޭ ދަންވަރު އަލިފާނުގެ ޙާދިޘާއެއްގައި އަނދައިގެން ގޮސް، ދޯނީގެ ވެރިފަރާތުން ޕޮލިސީގެ ދަށުން 1,350,000 ރުފިޔާ ހޯދުމަށް ދަޢުވާކުރިއެވެ. ޕޮލިސީގެ ވޮރަންޓީގައި ރޭގަނޑު 7:00 އިން ހެނދުނު 6:00 އަށް ދޯނީގައި މީހަކު ހުންނަންޖެހޭނެކަމަށް ބަޔާންކޮށްފައިވެއެވެ.

އިސްތިއުނާފުކުރި ފަރާތުން ބުނީ ހެކިން ޝަރީޢަތަށް ޙާޟިރުނުކޮށް ހެކިބަސް ނުހޯދާ މައްސަލަ ނިންމި ކަމަށާއި، ހުށަހެޅި ބައެއް ލިޔުންތަކާއި ބަޔާންތަކަށް ރިޢާޔަތްނުކުރި ކަމަށެވެ.

މެރިން ހަލް އިންޝުއަރެންސް ޕޮލިސީގެ ރޭގަނޑު ދޯނި ބެލެހެއްޓުމަށް މީހަކު ހުންނަންޖެހޭ ވޮރަންޓީއާ ޚިލާފުވެފައިވާތީ އިންޝުއަރެންސް ފައިސާ ނުދެވޭނެކަމަށް ސިވިލް ކޯޓުން ކުރި ޙުކުމް ޞައްޙަތޯ، އަދި އިސްތިއުނާފުކުރި ފަރާތުގެ ހެކިން ނުގެނެސް މައްސަލަ ނިންމުމަކީ ހެކި ހުށަހެޅުމުގެ ޙައްޤުން މަޙްރޫމްކުރުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޚަޞްމުންނަށް ހެކި ހުށަހެޅުމުގެ ޙައްޤު ލިބިގެންވިޔަސް ހައިކޯޓުން ހެކިން ޙާޟިރުކުރުމަށް ދިން ފުރުޞަތުގައި ހެކިންގެ ވަނަވަރު ނުދިނުމުން، ހާދިޘާ ހިނގިއިރު ދޯނި ބެލެހެއްޓުމަށް މީހަކު ހުރިކަން ސާބިތުނުވާތީ ސިވިލް ކޯޓުގެ ޙުކުމަށް ބަދަލުގެންނަންޖެހޭ ސަބަބެއް ނެތެވެ.