2016/HC-A/298

މާފުށީ މެޖިސްޓްރޭޓް ކޯޓުން، ސާބިތުވި 1,253,345.03 ރުފިޔާ 4 މަސްދުވަހުގެ ތެރޭގައި ދައްކަން ޙުކުމްކޮށް، ދޯނި ވިއްކުމުގެ އެއްބަސްވުން ބާޠިލުވެއްޖެކަމަށް ކަނޑައަޅައި، ސާބިތުނުވާ ބައި ނަގައި ނުދެވޭނެކަމަށް ޙުކުމްކޮށްފައިވެއެވެ.

ދޯންޏެއް ވިއްކުމަށް އެއްބަސްވެ ގަންނަ ފަރާތުގެ އަތުން ފައިސާ ނަގައި ދޯނި ނުދިނުމުން، ފައިސާ ހޯދުމަށް ކ. މާފުށީ މެޖިސްޓްރޭޓް ކޯޓަށް ދަޢުވާކޮށްފައިވެއެވެ. ދަޢުވާ ލިބޭ ފަރާތުގެ ދާއިމީ އެޑްރެހަކީ ކ. ހުރާއެވެ.

އިސްތިއުނާފުކުރި ފަރާތުން ބުނީ، ޝަރީޢަތް ހިންގާފައިވަނީ ޤާނޫނުއަސާސީގެ 42 އާއި 68 ވަނަ މާއްދާއާއި ނެޗުރަލް ޖަސްޓިސްގެ އުޞޫލުތަކާ ޚިލާފަށްކަމަށާއި، އެއްބަސްވުމުގައި ޙަޤީޤަތް އޮޅުވާލުމާއި ބޭއިންސާފު މާއްދާތައް ހިމެނޭކަމަށެވެ. ރައްދުވާ ފަރާތުން ބުނީ އިސްތިއުނާފު ހުށަހަޅާފައިވަނީ މުއްދަތު ހަމަވި ފަހުންކަމަށެވެ.

އިސްތިއުނާފު ހުށަހެޅީ މުއްދަތުގެ ތެރޭގައިތޯއާއި، ދަޢުވާ ފޯމާއި ލިޔުންތައް ދަޢުވާ ލިބޭ ފަރާތަށް ރައްދުނުކޮށް ޖަވާބުދާރީވުމުގެ ފުރުޞަތު ނުދީ ކުރި ޙުކުމް ޞައްޙަތޯއާއި، ދަޢުވާ ލިބޭ ފަރާތުގެ ދާއިމީ އެޑްރެސް ނުހުންނަ ދާއިރާގެ މެޖިސްޓްރޭޓް ކޯޓަށް މައްސަލަ ބެލުމުގެ އިޚްތިޞާޞް ލިބިގެންވޭތޯ.

ދަށުކޯޓުގެ ޙުކުމް ބާޠިލު (އިޚްތިޞާޞް ނެތުމުން)؛ އިޚްތިޞާޞް ލިބިގެންވާ ކޯޓަކަށް ދަޢުވާ އަލުން ހުށަހަޅައިފިނަމަ ފައިޞަލާކުރަނިވި ޙުކުމެއް ކުރަންޖެހޭ

އިސްތިއުނާފު ހުށަހަޅާފައިވަނީ މުއްދަތުގެ އެންމެ ފަހު ދުވަހުކަން ކަނޑައަޅައި، ދަޢުވާ ފޯމާއި ލިޔުންތައް ރައްދުކޮށް ޖަވާބުދާރީވުމުގެ ހަމަހަމަ ފުރުޞަތު ދީފައިވާކަން ފައިލުން ނޭނގޭކަމާއި، ކޯޓުތަކުގެ ޤާނޫނުގެ 69 ވަނަ މާއްދާގެ ދަށުން މި މައްސަލަ ބެލުމުގެ އިޚްތިޞާޞް މާފުށީ މެޖިސްޓްރޭޓް ކޯޓަށް ލިބިގެން ނުވާތީ ޙުކުމް ބާޠިލުކޮށްފައިވެއެވެ.