2016/HC-A/51

އެއްބަސްވުން ދަމަހައްޓައިދެވެން ނެތްކަމަށާއި ފްލެޓް އަނބުރާ ޙަވާލުކުރުމަށް އެންގި އެންގުން ބާޠިލްކަމަށް ކަނޑައަޅައިދެވޭނެ ތަނެއް ނެތްކަމަށް ހުޅުމާލެ މެޖިސްޓްރޭޓް ކޯޓުން ދަޢުވާކުރާ ފަރާތުގެ ޣައިރު ޙާޟިރުގައި ޙުކުމްކުރިއެވެ.

ވެށިފަހި މާލެ ޕްރޮގްރާމްގެ "ސީ" ކެޓަގަރީގެ ފްލެޓަށް އިސްތިއުނާފުކުރި ފަރާތާއި އޭނާގެ އަނބިމީހާ ހޮވުނުއިރު، ދެމަފިރިންނަށް ލިބޭނީ އެއް ފްލެޓް ކަމުން އަނބިމީހާއަށް ފުރުސަތު ދިނުމަށް އޭނާ ސިޓީއަކުން އެއްބަސްވެ، އަނބިމީހާއާ ފްލެޓެއް ޙަވާލުކުރެވުނެވެ. ދެން އިސްތިއުނާފުކުރި ފަރާތާއި އެޗްޑީސީއާ ދެމެދު އިތުރު ފްލެޓެއް ވިއްކުމުގެ އެއްބަސްވުމެއް ވެވުނުއިރު، އެއްބަސްވުން ބާޠިލްކުރާކަމަށް އެޗްޑީސީން ނޯޓިސް ފޮނުވިއެވެ.

އިސްތިއުނާފުކުރި ފަރާތުން ބުނީ، ކޮންޓްރެކްޓާބެހޭ ޤާނޫނުގެ 16 އާއި 22 (ނ) އަށް ރިޢާޔަތް ނުކޮށް ޙުކުމްކުރި ކަމަށާއި، ޤާނޫނުއަސާސީގެ 23 (ށ) ގެ ދަށުން ލިބިދޭ ހިޔާވަހިކަމުގެ ޙައްޤަށް ޤާނޫނުއަސާސީގެ 43 ވަނަ މާއްދާއާ ޚިލާފު އިދާރީ ފިޔަވަޅަކުން އުނިކަން އައިކަމަށެވެ. އެޗްޑީސީން ބުނީ، އޭނާއަކީ ޝަރުޠު ފުރިހަމަނުވާ ފަރާތެއްކަމަށާއި، ޙަޤީޤަތް އޮޅުވާލައިގެން އެއްބަސްވުމުގައި ސޮއިކުރުވި ކަމަށެވެ.

ވެށިފަހި މާލެ ޕްރޮގްރާމްގެ ދަށުން ފްލެޓް ގަތުމުގެ ޝަރުޠު ފުރިހަމަނުވާ ފަރާތަކާ ވެފައިވާ ފްލެޓް ވިއްކުމުގެ އެއްބަސްވުން އެޗްޑީސީން ބާޠިލްކުރުމަކީ ޤާނޫނުއަސާސީއާއި ކޮންޓްރެކްޓާބެހޭ ޤާނޫނާ ޚިލާފު ކަމެއްތޯ.

އިސްތިއުނާފު ބަލައިނުގަނެ، ދަށުކޯޓުގެ ޙުކުމް ޤާއިމް

ދެމަފިރިންނަށް ލިބޭނީ އެއް ފްލެޓްކަން އިޢުލާނުގައި ކަނޑައެޅިގެން ބުނެފައިވާއިރު، އިސްތިއުނާފުކުރި ފަރާތް އެ ޝަރުޠަށް އެއްބަސްވެ ފުރުސަތު ދޫކޮށްލާފައިވާތީ، އޭނާއަކީ ޝަރުޠު ފުރިހަމަވާ ފަރާތެއް ނޫނެވެ. ހެޔޮ ނިޔަތެއް ނެތި ޙަޤީޤަތް އޮޅުވާލައިގެން ވެވުނު އެއްބަސްވުން ބާޠިލްކުރުމަކީ ޤާނޫނާ ޚިލާފު ކަމެއް ނޫނެވެ.