އެޓަރނީ ޖެނެރަލްގެ އޮފީސް ވ. ޒިފާން ޒާހިރު

ސިވިލް ކޯޓުން، ލިސްޓުތަކަކީ ވަގުތީ ލިސްޓުތަކެއްކަން ސާބިތުނުވާކަމާއި ފަހުން އިތުރުކުރި ޝަރުޠުތަކަކީ ޞައްޙަ ޝަރުޠުތަކެއް ނޫންކަމަށް ބަލައި (C/2013-1532/Cv އަށް ތަބާވެ)، 30 ދުވަހުގެ ތެރޭގައި ފްލެޓް ޙަވާލުކުރުމަށް ދައުލަތަށް އަންގައި ޙުކުމްކުރެއްވިއެވެ.

ވެށިފަހި މާލެ ޕްރޮގްރާމްގެ 'ބީ' ކެޓަގަރީގެ ފްލެޓަށް ޝަރުޠު ފުރިހަމަވާ ފަރާތެއްގެ ގޮތުގައި އިޢުލާނުކޮށް ގުރުޢަތުން ހޮވުނު ފަރާތެއްގެ ނަން، އޭނާގެ އަނބިމީހާއަށް ހުޅުމާލެއިން ފްލެޓެއް ލިބިފައިވާތީ ހައުސިންގ މިނިސްޓްރީން ލިސްޓުން އުނިކުރިއެވެ. ފްލެޓަށް ހުށަހެޅި ފޯމުގައިވެސް އެ ފްލެޓް ލިބިފައިވާކަން ލިޔެފައިވިއެވެ. އިޢުލާނުތަކުގައި، މަޢުލޫމާތު ޗެކްކުރުމަށްފަހު ޝަރުޠު ހަމަނުވާކަމަށް ސާބިތުވާ ނަމަ ހޮވުން ބާޠިލުކުރެވޭނެކަމަށް ބަޔާންކޮށްފައިވިއެވެ.

އެޓަރނީ ޖެނެރަލްގެ އޮފީހުން ބުނީ، ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) ގެ 1 ވަނަ ނަންބަރާ ޚިލާފަށް ދައުލަތުން ފާހަގަކުރި ނުކުތާތަކަށާއި ޙާލަތްތަކަށް ރިޢާޔަތްނުކޮށް، އަދި ޤާނޫނުއަސާސީގެ 143 ވަނަ މާއްދާގެ (ރ) އާއި އެ ޤާނޫނުގެ 5 ވަނަ މާއްދާގެ (ށ) ގެ 2 ވަނަ ނަންބަރާ ޚިލާފަށް މައްސަލަ ނިންމާފައިވާކަމަށެވެ.

ވެށިފަހި މާލެ ޕްރޮގްރާމްގެ 'ބީ' ކެޓަގަރީގެ ފްލެޓް ލިބޭ ފަރާތްތަކުގެ ލިސްޓުން، އަނބިމީހާއަށް ސަރުކާރުގެ ހައުސިންގ ޕްރޮޖެކްޓަކުން ފްލެޓެއް ލިބިފައިވާތީ ދަޢުވާކުރި ފަރާތުގެ ނަން އުނިކުރުމަކީ ޤަވާޢިދާ ޚިލާފު ކަމެއްތޯ، އަދި ފްލެޓް ޙަވާލުކުރުމަށް ދައުލަތަށް އެންގި ސިވިލް ކޯޓުގެ ޙުކުމް ޞައްޙަތޯ.

ދަށުކޯޓުގެ ޙުކުމް ބާޠިލު

ފިރިމީހާ ނުވަތަ އަނބިމީހާއަށް ސަރުކާރުގެ ހައުސިންގ ޕްރޮޖެކްޓަކުން ފްލެޓް ލިބިފައިނެތުމަކީ ޕްރޮގްރާމުގެ ޝަރުޠަކަށްވާތީ، އަދި ފޯމުގައިވެސް ފްލެޓް ލިބިފައިވާކަން ލިޔެފައިވާތީ، ލިސްޓުން ނަން އުނިކުރުމަކީ ޤަވާޢިދާ ޚިލާފު ކަމެއް ނޫންކަމަށް ހައިކޯޓުން ކަނޑައެޅިއެވެ.