އެޓަރނީ ޖެނެރަލްގެ އޮފީސް ވ. : ފަރުހާނާ ވަޙީދު

ފްލެޓަށް ކުރިމަތިލުމަށް ހުޅުވާލިއިރު ނެތް ޝަރުޠުތަކެއް ފަހުން އިތުރުކޮށް އެ ޝަރުޠުތަކުގެ ސަބަބުން ޝަރުޠު ހަމަނުވާކަމަށް ނިންމުމަކީ ޞައްޙަ ނިންމުމެއް ނޫންކަމަށް ކަނޑައަޅައި، ދަޢުވާކުރި ފަރާތަށް ކުރިން ލިބިފައިވާ ފްލެޓް ދޫކޮށް ހޮވިފައިވާ ފްލެޓް ލިބިގަތުމަށް ފުރުޞަތު ދިނުމަށް ސިވިލް ކޯޓުން ދައުލަތަށް އެންގިއެވެ.

ވެށިފަހި މާލެ ޕްރޮގްރާމްގެ "ބީ" ކެޓަގަރީގެ ފައިނަލް ލިސްޓުގައި ނަން ހިމެނި ފްލެޓް ފައިސާ ދެއްކުމަށް އެންގުމަށްފަހު، ކުރިން ސަރުކާރުގެ ޕްރޮގްރާމެއްގެ ދަށުން ހުޅުމާލެއިން ފްލެޓެއް ލިބިފައިވާތީ ޝަރުޠު ހަމަނުވާކަމަށް ބުނެ ފްލެޓް ކެންސަލްކުރުމުން، ފްލެޓް ހަވާލުކުރުމަށް ދައުލަތުގެ މައްޗަށް ދަޢުވާ ހުށަހެޅިއެވެ.

އެޓަރނީ ޖެނެރަލްގެ އޮފީހުން ބުނީ ޝަރުޠު ހަމަނުވާކަމަށް ދައުލަތުން ފާހަގަކުރި ނުކުތާއަށް ރިޢާޔަތްނުކޮށް ނިންމާފައިވާކަމަށާއި، ފަނޑިޔާރުންގެ ޤާނޫނުގެ 5 ވަނަ މާއްދާއާއި ޤާނޫނުއަސާސީގެ 143 ވަނަ މާއްދާއާ ޚިލާފުކަމަށާއި، ޚަޞްމުންނަށް ވަކާލާތުކުރުމުގެ ފުރުޞަތު ނުދީ ހައިކޯޓާއި ސިވިލް ކޯޓުގެ ޤަޟިއްޔާތައް ތަޠްބީޤުކުރިކަމަށާއި، ދަޢުވާގައި ނުއެދޭ ކަމަކަށް ފަރުވާދީފައިވާކަމަށެވެ.

ވެށިފަހި މާލެ ޕްރޮގްރާމްގެ "ބީ" ކެޓަގަރީގެ ފައިނަލް ލިސްޓުގައި ނަން ހިމެނުމަށްފަހު، ސަރުކާރުގެ ބޯހިޔާވަހިކަމުގެ ޕްރޮގްރާމެއްގެ ދަށުން ކުރިން ފްލެޓެއް ލިބިފައިވާތީ ޝަރުޠު ހަމަނުވާކަމަށް ބުނެ ފްލެޓް ކެންސަލްކުރުމަކީ ޕްރޮގްރާމްގެ އުޞޫލުތަކާ ޚިލާފު ކަމެއްތޯ.

ދަށުކޯޓުގެ ޙުކުމް ބާޠިލު

ސަރުކާރުގެ ޕްރޮޖެކްޓެއްގެ ދަށުން ފްލެޓެއް ލިބިފައި ނެތުމަކީ "ބީ" ކެޓަގަރީގެ ޝަރުޠެއްކަމަށާއި، ފައިނަލް ލިސްޓުގެ އިޢުލާނުގައި ޝަރުޠު ހަމަނުވާކަން ސާބިތުވާނަމަ ހޮވުން ބާޠިލުކުރެވޭނެކަމަށް ބަޔާންކޮށްފައިވާތީ، ކުރިން ފްލެޓެއް ލިބިފައިވާ ފަރާތެއްގެ ފްލެޓް ވަކިކުރުމަކީ ޕްރޮގްރާމްގެ އުޞޫލުތަކާ ޚިލާފު ކަމެއް ނޫންކަމަށް ހައިކޯޓުން ކަނޑައެޅިއެވެ.