2016/HC-A/423

ސިވިލް ކޯޓުން، ދެފަރާތުން އިޚްތިޔާރުގައި އެއްބަސްވާގޮތް ނޫންގޮތަކަށް ޝަރީޢަތުން ވަކި ގޮތަކަށް އެއްބަސްވުމަށް އަންގާނެ ތަނެއް ނެތްކަމަށް ކަނޑައަޅައި ޙުކުމްކުރިއެވެ.

ހ. މާރަމްގެ 01 ވަނަ ފަންގިފިލާ 35 އަހަރަށް ކުއްޔަށް ދިނުމަށް ދެފަރާތް އަނގަބަހުން އެއްބަސްވެ، ކުއްޔަށް ހިފި ފަރާތުން ކުލީގެ ގޮތުގައި އެކިފަހަރުމަތިން ފައިސާ ދައްކައި، އިންޓީރިއަރ މަސައްކަތަށް ޚަރަދުކުރިއެވެ. ތަނުގެ ވެރިން ލިޔުމުން އެއްބަސްވުމަކަށް އައުމަށް އިންކާރުކުރުމުން، އެއްބަސްވުމަށް ޢަމަލުކުރުމަށް އަމުރުކޮށްދިނުމަށް އެދި ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ލިޔުމުން އެއްބަސްވުމެއް ވާނެކަމަށް ދެފަރާތުން އިޤްރާރުވާއިރު އެ ދިފާޢަށް ފަރުވާއެއް ނުދޭކަމަށާއި، ހެކިބަހުގެ ބުރަދަން ރަނގަޅަށް ދިރާސާނުކޮށް، ޝަރީޢަތްކުރުމާބެހޭ ޤަވާޢިދުގެ 228 (4) އާ ޚިލާފަށް ހެކިބަހަކަށް ބުރަދަން ދީފައިވާކަމަށެވެ. ރައްދުވި ފަރާތްތަކުން ބުނީ، ކުލި ދައްކަންޖެހެނީ 1 އަހަރުގެ ތެރޭގައި ކަމަށާއި، އެއްބަސްވުމާ ޚިލާފުވެފައިވާކަމަށެވެ.

އަނގަބަހުން ވެވުނު ކުލީގެ އެއްބަސްވުމެއް ދެމެހެއްޓެންޖެހޭ އެއްބަސްވުމެއްތޯ؛ އަދި ޝަރުޠުތަކާމެދު ދެފަރާތުގެ މެދުގައި ޚިލާފު އޮތްއިރު، އަނގަބަހުން އެއްބަސްވި ގޮތަށް ލިޔުމުން އެއްބަސްވުމަކަށް އައުމަށް ކޯޓުން އަމުރުކުރެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

މުއްދަތު ފާއިތުވުމަށްފަހުވެސް ކުލި ބަލައިގަތުމުން އެއްބަސްވުން ކުރިއަށް ގެންދިއުމަށް ރުހުން އޮތްކަން ޟިމްނީކޮށް އެނގޭތީ އެއްބަސްވުމަކީ ދަމަހައްޓަންޖެހޭ އެއްބަސްވުމެއް ނަމަވެސް، ޝަރުޠުތަކާމެދު ޚިލާފު އޮތްއިރު ކޯޓަކުން ވަކި ގޮތަކަށް އެއްބަސްވުމަށް އެންގޭނެ ތަނެއް ނެތުމުން ދަށުކޯޓުގެ ޙުކުމަށް ބަދަލު ނުގެނެވުނެވެ.