2016/HC-A/26

ކުއްޔަށް ހިފައިގެން ތިބި މުއްދަތަށް ޖެހޭ ކަރަންޓް ބިލާއި ފެން ބިލް ޑިޕޮޒިޓުން އުނިކުރުމަށްފަހު ބާކީ ފައިސާ ކުއްޔަށް ހިފި ފަރާތަށް ދައްކާ ޚަލާޞްކުރުމަށް ސިވިލް ކޯޓުން ޙުކުމްކުރެވުނެވެ.

ބިލްޑިންގެއްގެ ފަންގިފިލާއެއް ބޭންކަކަށް ކުއްޔަށް ދިނުމުގެ އެއްބަސްވުމުގެ ދަށުން ބެހެއްޓި އެޑްވާންސް ސެކިއުރިޓީ ޑިޕޮޒިޓް، އެއްބަސްވުން ނިމި ތަން ހަވާލުކުރުމަށްފަހުވެސް ތަނުގެ ވެރިފަރާތުން އަނބުރާ ނުދިނެވެ.

ތަނުގެ ވެރިފަރާތުން ބުނީ ކުއްޔަށް ހިފި ފަރާތުން އެއްބަސްވުމުގެ ޝަރުޠުތައް ފުރިހަމަކުރިތޯ ނުބަލައި، ޢިމާރާތް އިހުހުރި ގޮތަށް ރުޖޫޢުކުރުމާއި ގެއްލުން މަރާމާތުކުރުމުގެ ޚަރަދު އުނިނުކޮށް، ބިލްތައް ދުވަހުގެ ނިސްބަތުން ބަހާފައިވަނީ ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފަށް ކަމަށެވެ. ބޭންކުން ބުނީ ތަން ހަވާލުކުރިއިރު ގެއްލުމެއްގެ ވާހަކަ ނުބުނާ ކަމަށާއި ޢިމާރާތަށް ބަދަލެއް ނުގެނޭ ކަމަށެވެ.

ކުއްޔަށް ދިނުމުގެ އެއްބަސްވުމެއް ނިމުމުން އެޑްވާންސް ސެކިއުރިޓީ ޑިޕޮޒިޓް ކުއްޔަށް ހިފި ފަރާތަށް އަނބުރާ ދޭންޖެހޭތޯއާއި، ޢިމާރާތަށް ލިބުނު ގެއްލުމާއި ބަދަލުތައް ރުޖޫޢުކުރުމުގެ ޚަރަދު ޑިޕޮޒިޓުން އުނިނުކުރުމަކީ ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޑިޕޮޒިޓުން އުނިކުރެވޭ ކަންކަމުގެ ތެރެއިން ކަރަންޓް ބިލާއި ފެން ބިލް ފިޔަވައި ތަނުގެ ވެރިފަރާތުން ބުނާ އެހެން ކަންކަން ސާބިތުނުވާތީއާއި، ތަން ހަވާލުކުރިއިރު ޝަކުވާއެއް ނުކޮށްހުރެ ފަހުން އިޢުތިރާޒުކުރުން ބަލައިނުގަނެވޭތީ ސިވިލް ކޯޓުގެ ޙުކުމް ޤާއިމްކުރެވުނެވެ.