2017/HC-A/119

މުއްދަތު އިތުރުކުރުމަށް 6 މަސް ކުރިން ހުށަހަޅާފައިވާކަން ސާބިތުނުވާތީ އެއްބަސްވުން މުއްދަތު ހަމަވުމުން ނިމިފައިވާ ކަމަށާއި، ކައުންސިލުން އެއްބަސްވުމާ ޚިލާފަށް ޢަމަލުކުރިކަން ސާބިތުނުވާތީ މުއްދަތު އިތުރުކުރުމަށް އަމުރުކޮށް ގެއްލުމުގެ ބަދަލު ނަގައިދެވެން ނެތް ކަމަށް ސިވިލް ކޯޓުން ޙުކުމްކުރިއެވެ.

2005 ގައި ބިމެއް ކުއްޔަށް ދިނުމުގެ އެއްބަސްވުމެއް ވެފައިވާއިރު، އޭގެ 11 ވަނަ މާއްދާގައި މުއްދަތު އިތުރުކުރުމުގެ ފުރަތަމަ ފުރުސަތު ކުއްޔަށް ހިފާ ފަރާތަށް ދިނުމާއި، މުއްދަތު ހަމަވުމުގެ 6 މަސް ކުރިން ދެފަރާތް ވާހަކަ ދައްކައި ގޮތެއް ނިންމުން ބަޔާންކޮށްފައިވެއެވެ. 2012 ގައި މުއްދަތު ހަމަވުމުން ކައުންސިލުން ބިޑަކުން ބިން އެހެން ފަރާތަކަށް ކުއްޔަށް ދިނެވެ.

ސިވިލް ކޯޓުން ކޮންޓްރެކްޓާބެހޭ ޤާނޫނުގެ 20 ވަނަ މާއްދާގެ (ހ) އާ ޚިލާފަށް ޙުކުމްކުރި ކަމަށާއި، ކުއްޔަށް ދިނުމުގެ އެއްބަސްވުމުގެ 11 ވަނަ މާއްދާ މާނަކުރީ އޭގެ މަޤްޞަދު ޙާޞިލުނުވާ ގޮތަށް ކަމަށާއި، ކޮންޓްރެކްޓާބެހޭ ޤާނޫނުގެ 23 ވަނަ މާއްދާގައިވާ ރައްކާތެރިކަމަށް ރިޢާޔަތް ނުކުރި ކަމަށް އިސްތިއުނާފުކުރި ފަރާތުން ބުނެފައިވެއެވެ.

ބިމެއް ކުއްޔަށް ދިނުމުގެ އެއްބަސްވުމުގެ މުއްދަތު އިތުރުކުރުމުގެ ފުރަތަމަ ފުރުސަތުގެ މާއްދާގެ ދަށުން، މުއްދަތު ހަމަވުމުން ކުއްޔަށްދޭ ފަރާތުން މުއްދަތު އިތުރު ނުކޮށްދިނުމަކީ އެއްބަސްވުމާ ޚިލާފު ޢަމަލެއްތޯ، އަދި ކުއްޔަށް ހިފި ފަރާތަށް ގެއްލުމުގެ ބަދަލު ލިބެންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުއްޔަށް ދިނުމުގެ އެއްބަސްވުމުގެ 11 ވަނަ މާއްދާގެ ދަށުން މުއްދަތު އިތުރުކުރުމަށް ދެފަރާތް އެއްބަސްވެފައި ނުވާތީއާއި، ބިން އެހެން ފަރާތަކަށް ދިނުމަށް ކުއްޔަށް ހިފި ފަރާތުން އެކަށީގެންވާ ގޮތެއްގައި އިޢުތިރާޟު ނުކުރާތީ، އަދި ނިމުނު ކޮންޓްރެކްޓެއް އަނެއް ފަރާތުގެ ނުރުހުމުގައި ދެމެހެއްޓުމަކީ pacta sunt servanda އާ ތަޢާރުޟުވާ ކަމަކަށްވާތީ، މުއްދަތު އިތުރު ނުކުރުމަކީ އެއްބަސްވުމާ ޚިލާފު ޢަމަލެއް ނޫން ކަމަށް ކޯޓުން ކަނޑައެޅިއެވެ.