2015/HC-A/127

ސިވިލް ކޯޓުން ބާކީ ކުއްޔާއި އެއްބަސްވުމުގެ 4 ވަނަ މާއްދާގެ ދަށުން ގެއްލުމުގެ ބަދަލު ކުއްޔަށް ހިފި ފަރާތުން ދައްކަން ޙުކުމްކުރި.

ލޯންޗެއް މަހަކު ކަނޑައެޅިފައިވާ ކުއްޔަކަށް ދިނުމަށް ވެފައިވާ އެއްބަސްވުމެއްގެ ދަށުން، ބައެއް މުއްދަތުގެ ކުލި ނުދެއްކުމުން ކުއްޔަށް ދިން ފަރާތުން ލޯންޗު އަތުލައި، ބާކީ ކުއްޔާއި ދުވާލަކަށް ކަނޑައެޅިފައިވާ ގެއްލުމުގެ ބަދަލު ހޯދުމަށް ދަޢުވާކުރި.

ކުއްޔަށް ދިން ފަރާތް އެއްބަސްވުމާ ޚިލާފުވެ، ލޯންޗުގެ ސަލާމަތީ ސެޓްފިކެޓުގެ މުއްދަތު ހަމަވެފައިވުމުން ލޯންޗުގެ މަންފާ ނުލިބުނުކަމަށް ކުއްޔަށް ހިފި ފަރާތުން ބުނި.

ކުއްޔަށް ހިފި ލޯންޗުގެ ސަލާމަތީ ސެޓްފިކެޓު ނެތުމުން ގެއްލުން ލިބުނު ކަމަށް ބުނެ، ލޯންޗު ކުއްޔަށް ހިފި ފަރާތުގެ ބާރުގެ ދަށުގައި އޮތް މުއްދަތުގެ ކުއްޔާއި އެއްބަސްވުމުގައިވާ ގެއްލުމުގެ ބަދަލު ނުދެއްކުމުގެ ޙައްޤު ކުއްޔަށް ހިފި ފަރާތަށް ލިބޭތޯ؛ އަދި ކުއްޔަށް ދިން ފަރާތް އެއްބަސްވުމާ ޚިލާފުވިކަމަށް ބުނާ ނުކުތާއަށް ރިޢާޔަތްނުކޮށް ސިވިލް ކޯޓުން މައްސަލަ ނިންމާފައިވަނީ ޤާނޫނާ ޚިލާފަށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާކުރި މުއްދަތުގެ ކުރިން ސެޓްފިކެޓް އައުކޮށްފައިވާއިރު އެމުއްދަތުގައި ލޯންޗު އޮތީ ކުއްޔަށް ހިފި ފަރާތުގެ ފުރިހަމަ ބާރުގެ ދަށުގައި ކަމުން ކުލި ދައްކަންޖެހޭ؛ ގެއްލުމުގެ ބަދަލު ހޯދުމަށް ދަޢުވާކުރެވޭނެ ނަމަވެސް ކުލި ނުދެއްކުމަށް އެއީ ޙުއްޖަތެއް ނޫން.