ޢަލީ އާދަމް ވ. ފޯވޭ މޯލްޑިވްސް ޕަރައިވެޓް ލިމިޓެޑް

ސިވިލް ކޯޓުން، އެއްބަސްވުން ބާޠިލުވެއްޖެކަމަށް ކަނޑައަޅާނެ ތަނެއް ނެތްކަމަށާއި، އެއްބަސްވުމާ ޢަލީ އާދަމް ޚިލާފުވެފައިވާކަމަށް ކަނޑައަޅައި، އެއްބަސްވުމުގެ މާއްދާތަކަށް ޙުރުމަތްތެރިވުމަށް އަންގައި، ގެއްލުމުގެ ބަދަލު ވަކި ޤަޟިއްޔާއަކުން ހޯދިދާނެކަމަށް ޙުކުމްކުރިއެވެ.

ޢަލީ އާދަމް ފޯވޭ މޯލްޑިވްސް ޕްރައިވެޓް ލިމިޓެޑަށް އެޕާޓްމަންޓެއް ކުއްޔަށް ދިން އެއްބަސްވުމުގައި ކުލި ކޮންމެ މަހެއްގެ 7 ގެ ކުރިން ދައްކަންޖެހޭނެކަމަށާއި، ލަސްވާ ކޮންމެ ދުވަހަކަށް ޖޫރިމަނާ ދައްކަންޖެހޭނެކަމަށާއި، ކުލި ނުދައްކާތާ 30 ދުވަސް ވެއްޖެނަމަ ތަން ޙަވާލުކުރަންޖެހޭނެކަމަށް ބަޔާންކޮށްފައިވެއެވެ. 2011 އޯގަސްޓް މަހުގެ ކުލި ދައްކަން ދިޔައިރު ޢަލީ އާދަމް ކުލި ބަލައިނުގަނެ އެއްބަސްވުން ބާޠިލުވީކަމަށް ބުނުމުން ކުންފުނިން ސިވިލް ކޯޓަށް ދަޢުވާކުރިއެވެ.

ޢަލީ އާދަމް ބުނީ ކުންފުނިން ކުލި ގެނައީ މަދުން ކަމަށާއި، ހުށަހެޅި ހެކި ކޯޓުން ނުބަލާކަމަށާއި، މަހުން މަހަށް ކުލި ނުދައްކާ ކޮންމެ ފަހަރަކީ އެއްބަސްވުމާ ޚިލާފުވުމެއްކަމަށް 2011/HC-A/132 ގައިވާ އުޞޫލު ތަޠުބީޤުނުކުރުމަކީ ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ކަމެއްކަމަށެވެ.

އެޕާޓްމަންޓެއް ކުއްޔަށް ދިނުމުގެ އެއްބަސްވުމުގައިވާ މުއްދަތުގައި ކުލި ނުދެއްކުމުން އެއްބަސްވުން ބާޠިލުވީތޯއާއި، ކުލި މަދުން ގެނައިކަމަށް ބުނާ ބުނުން ސާބިތުވޭތޯއާއި، 2011/HC-A/132 ގައިވާ އުޞޫލު މި މައްސަލައަށް ތަޠުބީޤުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުލި ދައްކަން ގެންދިޔަ ފައިސާ މަދުކަމަށް ސާބިތުނުވެއެވެ. ކުންފުނިން ފައިސާ ޙަވާލުކުރަން މަސައްކަތްކޮށް، 30 ދުވަހުގެ މުއްދަތު ހަމަނުވަނީސް މައްސަލަ ކޯޓަށް ހުށަހަޅާފައިވާތީ، 2011/HC-A/132 ގައިވާ ގޮތަށް ކުލި ދައްކަންޖެހޭކަމަށް ނުބެލެވެއެވެ.