2016/HC-A/242

ފާދިއްޕޮޅު ނައިފަރު މެޖިސްޓްރޭޓް ކޯޓުން ތަރިކަ ½ ގެ ގޮތުގައި ބަހާ، އަޚުގެ ބަޔުގެ އަގު އަންހެން ދަރީގެ ވާރިޘުން ދީ ޚަލާޞްކޮށްފިނަމަ ގޯތި އަންހެން ދަރިއަށް މިލްކުވާނެ ކަމަށް ޙުކުމްކުރިއެވެ.

ނިޔާވި މީހެއްގެ ތަރިކައިގައި ހިމެނުނީ ކުރިން ބައިކޮށް ލިބިފައިވާ ކުދި ބަންޑާރަ ގޯއްޗެއްގައިވާ ގެއެވެ. ވާރިޘުންގެ ގޮތުގައި ތިބީ އޭނާގެ އަންހެން ދަރިއަކާއި އެއްބަނޑު އެއްބަފާ އަޚެކެވެ. ގޯތި ބިމުގެ ޒާތުން ބައިކުރުމަށް ބޭނުންވިއެވެ.

އަޚުގެ ވާރިޘުންގެ ފަރާތުން ބުނީ ޙުކުމަކީ ބިމާބެހޭ ޤާނޫނުގެ ތަރިކަ ބައިކުރުމާ ބެހޭ މާއްދާއާ ޚިލާފު ޙުކުމެއް ކަމަށެވެ.

ތަރިކައިގައި ހިމެނޭ ބަންޑާރަ ގޯއްޗެއް ވާރިޘުންގެ މެދުގައި ބިމުގެ ޒާތުން ބައިކުރާއިރު ކޮންމެ ބައެއް 600 އަކަފޫޓަށްވުރެ ކުޑަވާނަމަ، ވާރިޘަކަށް ބިމުގެ ބަދަލުގައި އޭނާގެ ބަޔުގެ އަގު ދީގެން ގޯތި އަނެއް ވާރިޘަށް ދިނުމަކީ ބިމާބެހޭ ޤާނޫނާ އެއްގޮތް ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ގޯތި ދެބައިކޮށްފިނަމަ ކޮންމެ ބައެއް 600 އަކަފޫޓަށްވުރެ ކުޑަވާތީ، މައްސަލަ ހުށަހެޅުނު އިރު ޢަމަލުކުރަމުން ދިޔަ ޤާނޫނާއި ޤަވާޢިދުގެ ދަށުން ބިމުގެ ޒާތުން ބައެއް ދެވެން ނެތެވެ. އެހެންކަމުން ބަޔުގެ އަގު ދީގެން ގޯތި އަނެއް ވާރިޘަށް ދިނުމަކީ ޝަރުޢީ އަދި ޤާނޫނީ އުޞޫލުތަކާ އެއްގޮތް ކަމެކެވެ.