އާމިނަތު ޙުސައިން ވ. ފަރީދާ ޙުސައިން

މެޖިސްޓްރޭޓް ކޯޓުން ބިމާބެހޭ ޤާނޫނާއި ބަންޑާރަ ގޯތީގެ ބިމުން ލިބުމާބެހޭ ގަވާއިދާ އެއްގޮތަށް ގޯތި 11 ވާރިސަކާ ދެމެދު ބަހައި، ކޮންމެ ވާރިސަކަށް 608 އަކަފޫޓުގެ ބިން ކަނޑައަޅައި، ބިމަށް އަރާފައިވާ ޢިމާރާތާއި ރުއްގަސް ބިން ލިބުނު މީހެއްގެ މިލްކުކަމަށް ކަނޑައެޅިއެވެ.

މަރުޙޫމެއްގެ ތަރިކައިގެ މައްސަލަ ކުރިން މެޖިސްޓްރޭޓް ކޯޓުން ބަލައި ވާރިސުންނާއި ބައިތައް ކަނޑައަޅައި ފައިސާ ބަހައިދީފައިވާއިރު، ތަރިކާގައި ހިމެނޭ ބަންޑާރަ ގޯތި ވާރިސުންގެ މެދުގައި ބަހައިދިނުމަށް ވާރިސަކު ދަޢުވާކުރިއެވެ. ބައެއް ވާރިސުން ގޯތި ބެހުމުގެ ގޮތާމެދު އެއްބަސް ނުވިއެވެ.

ކުރީގެ ޙުކުމާ ފުށުއަރާ ގޮތަށް ގޯތި އަލުން ބެހުމާއި، ގޯތި މަރުޙޫމު ޙަޔާތުގައި ހިބައިން ދިންކަން ޘާބިތުކުރަން ހެކި ހުށަހެޅުމުގެ ފުރުޞަތު ނުދިނުމާއި، ވާރިސުން ދިން ހަދިޔާ އަނބުރާ ގެނައުމާއި، ބިމާބެހޭ ޤާނޫނުގެ އިސްލާޙު ރަޖްޢީކޮށް ތަޠްބީޤުކުރުމާއި، ވާރިސުންގެ މަޞްލަޙަތަށް ބަލާފައި ނުވުން ކަމަށް އިސްތިއުނާފުކުރި ފަރާތްތަކުން ހުށަހެޅިއެވެ.

ކުރިން ތަރިކަ ބެހުމުގެ މައްސަލައެއް ނިމިފައިވަނިކޮށް، އެ ތަރިކާގައި ހިމެނޭ ބަންޑާރަ ގޯތި ވާރިސުންގެ މެދުގައި ބަހައިދިނުމަކީ ކުރީގެ ޙުކުމާ ފުށުއަރާ ނިންމުމެއްތޯއާއި، ގޯތި މަރުޙޫމު ޙަޔާތުގައި ހިބައިން ދީފައިވާކަމުގެ ދަފްޢު ބެލެވިދާނެތޯއާއި، ބިމާބެހޭ ޤާނޫނަށް ގެނެވުނު އިސްލާޙާއި ކާފަދަރިންގެ ޙައްޤާއި ވާރިސުންގެ މަޞްލަޙަތު ދެކެ ބިން ބެހުމުގައި ޢަމަލުކުރަންޖެހޭ އުޞޫލުތައް.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުރީގެ ޤަޟިއްޔާގައި ގޯތި ބަހައިދީފައި ނުވާތީ ގޯތި ބެހުމަކީ ފުށުއަރާ ނިންމުމެއް ނޫންކަމަށާއި، ތަރިކައިގެ ގޯއްޗެއްކަމަށް ކަނޑައެޅި ނިންމުން އިސްތިއުނާފު ނުކުރާތީ ހިބައިގެ ދަފްޢު ބެލޭނެ ޖާގައެއް ނެތްކަމަށާއި، ބިން ބެހީ ޤާނޫނާއި ގަވާއިދާ އެއްގޮތަށްކަމުން އެއީ މަޞްލަޙަތު ހުރި ގޮތްކަމަށް ކަނޑައަޅައި ދަށުކޯޓުގެ ޙުކުމް ޤާއިމްކުރެވުނެވެ.