މަރްޔަމް ޝަކީބާ ވ. އިބްރާހީމް ރަޝީދު

ފޭދޫ މެޖިސްޓްރޭޓް ކޯޓުން ގޯތި 8 ބަޔަކަށް ބައިކޮށް 8 ދަރިންނަށް ކަނޑައެޅިއިރު، ހުވަފަތް އަނބިމީހާއަށް ބައެއް ހަމަނުޖައްސައެވެ.

ނިޔާވެފައިވާ ފިރިހެނެއްގެ ނަމުގައި ރަޖިސްޓްރީކުރެވިފައިވާ ބަންޑާރަ ގޯތި ވާރިޘުންގެ މެދުގައި ބެހުމަށް ދަރިއެއް ހުށަހެޅި މައްސަލައެކެވެ. 9 ވާރިޘުންގެ ތެރެއިން 3 ވާރިޘުން (ހުވަފަތް އަނބިމީހާ ހިމެނޭ ގޮތަށް) ނިޔާވެފައިވެއެވެ.

އިސްތިއުނާފު ކުރި ފަރާތް (އަނބިމީހާގެ ދަރިއެއް) ބުނީ، އަނބިމީހާ ވާރިޘެއްކަމަށް ކަނޑައަޅައިގެން ބައެއް ނުދީ، ވާރިޘުންގެ ބަސް ނުހޯދައި، ހަމަހަމަ ނޫން ގޮތަކަށް ގޯތި ބައިކޮށްފައިވާ ކަމަށެވެ. (އިސްތިއުނާފު ކުރުމުގެ މުއްދަތު ފަހަނައެޅުމަށްފަހު ހައިކޯޓުން ހުއްދަ ދީފައިވެއެވެ.)

ބަންޑާރަ ގޯއްޗެއް ހިމެނޭ ތަރިކައެއް ވާރިޘުންގެ މެދުގައި ބައިކުރިއިރު، ހުވަފަތް އަނބިމީހާއަށް ބައެއް ހަމަނުޖައްސައި، އަދި ވާރިޘުންނަށް ހަމަހަމަ ނޫން ގޮތަކަށް ބައިކުރުމަކީ ޝަރުޢީ އަދި ޤާނޫނީ އުޞޫލުތަކާ އެއްގޮތް ނިންމުމެއްތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ފޮނުވި

އަނބިމީހާގެ ކިބައިގައި ވާރުތަވުން މަނާކުރާ ކަމެއް ނެތުމުން ޝަރުޢީ ގޮތުންނާއި ބިމާބެހޭ ޤާނޫނުގެ 15 ވަނަ މާއްދާގެ ދަށުން އޭނާއަށް ބައެއް ލިބެންޖެހެއެވެ. އަދި ސަބަބެއް ބަޔާންނުކޮށް ހަމަހަމަ ނޫން ގޮތަކަށް ބައިކުރުމަކީ ޤަބޫލުކުރެވޭނެ ކަމެއް ނޫނެވެ.