2016/HC-A/180

ސިވިލް ކޯޓުން އެއްބަސްވުން ބާޠިލުކޮށް، ޚަރަދު ހޯދުމަށް ދަޢުވާކުރުމުގެ ޙައްޤު ކުއްޔަށް ހިފި ފަރާތަށް އަބަދަށް ލިބިގެންވާކަމަށް ކަނޑައަޅައި، 15 ދުވަހުގެ ތެރޭގައި ތަން ހުސްކޮށް ޙަވާލުކުރުމަށް ޙުކުމްކުރިއެވެ.

އިމާރާތެއް 8 އަހަރާއި 1 މަހަށް ކުއްޔަށް ދިނުމަށް ވެފައިވާ އެއްބަސްވުމުގެ 8 ވަނަ މާއްދާގައި ކުލި ދައްކަމުން ދާހާ ހިނދަކު އެއްބަސްވުން ބާޠިލުނުކުރެވޭނެ ކަމަށާއި، މުއްދަތު ހަމަވުމުގެ ކުރިން ނެރެވޭނީ 6 ވަނަ މާއްދާގައިވާ ޢިމާރާތް ހެދުމުގެ ޚަރަދު އެއްފަހަރާ ދިނުމަށްފަހު ކަމަށް ބުނެފައިވެއެވެ. ކުއްޔަށްދިން ފަރާތުން ޚަރަދު ހާމަކުރުވައި، ކުއްޔަށް ހިފި ފަރާތަށް ދީ އެއްބަސްވުން ބާޠިލުކޮށްދިނުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ދެފަރާތުގެ ނިޔަތަކީ ކުލި ދައްކަމުން ދާހާ ހިނދަކު މުއްދަތު ހަމަވަންދެން އެއްބަސްވުމުގައި ދެމިތިބުން ކަމަށާއި، ޙުކުމަކީ އެއްބަސްވުމުގެ 8 ވަނަ މާއްދާއާއި ދަޢުވާގައި އެދުނު ގޮތާ ޚިލާފު ޙުކުމެއް ކަމަށެވެ.

ކުލި ދައްކަމުން ދާހާ ހިނދަކު އެއްބަސްވުން ބާޠިލުނުކުރެވޭނެ ކަމަށާއި، ބާޠިލުކުރެވޭނީ ޢިމާރާތް ހެދުމަށް ކުރި ޚަރަދު ދިނުމަށްފަހު ކަމަށް ބުނާ މާއްދާއެއް އޮތް ކުލީގެ އެއްބަސްވުމެއް، އެ ޚަރަދާމެދު ގޮތެއް ނިންމުމެއްނެތި ސިވިލް ކޯޓުން ބާޠިލުކޮށް ތަން ހުސްކުރުމަށް ޙުކުމްކުރުން ޞައްޙަތޯ؛ އަދި ދަޢުވާގައި އެދުނު ގޮތާ ޚިލާފަށް ޙުކުމްކުރެވިދާނެތޯ.

ދަށުކޯޓުގެ ޙުކުމް ބާޠިލު

އެއްބަސްވުމުގެ 8 ވަނަ މާއްދާއިން ކުއްޔަށްދޭ ފަރާތަށް ސަބަބެއް ބަޔާންކޮށް ބާޠިލުކުރަން އެދެވޭނަމަވެސް، ބާޠިލުކުރެވޭނީ ޢިމާރާތުގެ ޚަރަދު އެއްފަހަރާ ދިނުމަށްފަހުގައެވެ. ސިވިލް ކޯޓުން ބާޠިލުކޮށް ތަން ހުސްކުރުމަށް ޙުކުމްކުރީ އެ ޙައްޤާމެދު ގޮތެއް ނިންމުމެއްނެތި، އަދި ދަޢުވާގައި އެދުނު ގޮތާ ޚިލާފަށެވެ.