2017/HC-A/48

ހުޅުމާލޭ މެޖިސްޓްރޭޓް ކޯޓުން (471/HMC/2015) ކަނޑައެޅީ، ސިނާޢަތް ޤާއިމުކުރަންޖެހޭ ވަކި ތާރީޚެއް އެއްބަސްވުމުގައި ނެތުމާއި، އެއްބަސްވުން ނިމުމަކަށް ގެނެވޭނެ ޙާލަތަކަށް ކުޅަ ޢަމަލު ނުފެތުމާއި، ނިމުމަކަށް ގެންނައިރު ފުރިހަމަކުރަންޖެހޭ އިޖުރާއާތު ފުރިހަމަނުކުރުމުން ނޯޓިސް ބާޠިލް ކަމަށާއި، އެއްބަސްވުން ދެމިއޮންނާނެ ކަމަށެވެ.

ހައުސިންގ ޑިވެލޮޕްމަންޓް ކޯޕަރޭޝަނުން 2005 ވަނަ އަހަރު ވެވުނު އެއްބަސްވުމެއްގެ ދަށުން ހުޅުމާލޭގެ ސިނާއީ ބިމެއް 25 އަހަރަށް ވިލާ ޓެކްނޮލޮޖީސް ޕްރައިވެޓް ލިމިޓެޑަށް ކުއްޔަށް ދިނެވެ. ގާތްގަނޑަކަށް 10 އަހަރު ވީއިރުވެސް އެބިމުގައި ސިނާޢަތް ޤާއިމުނުކުރުމުން، 17 ސެޕްޓެމްބަރު 2015 ގައި ސިޓީއަކުން ކޯޕަރޭޝަނުން އެއްބަސްވުން ނިމުމަކަށް ގެނެސް ދިނެވެ.

އިސްތިއުނާފުކުރި ކޯޕަރޭޝަނުން ބުނީ، އެއްބަސްވުމުގެ ޖައުހަރީ މާއްދާއަކާ ޚިލާފުވެފައިވާކަމަށާއި، ކޮންޓްރެކްޓާބެހޭ ޤާނޫނުގެ 20 ވަނަ މާއްދާގެ (ހ) އާއި (ނ) އަށާއި އެއްބަސްވުމުގެ 16 ވަނަ މާއްދާއިން ދޭ އިޚްތިޔާރަށް ދަށުކޯޓުން ރިޢާޔަތް ނުކުރާ ކަމަށެވެ. ރައްދުވި ފަރާތުން ބުނީ، މިއީ ކުލީގެ އެއްބަސްވުމެއް ކަމަށާއި ބިން ތަރައްޤީކުރުމަކީ ޖައުހަރީ މާއްދާއެއް ނޫން ކަމަށެވެ.

ސިނާއީ ބޭނުމަށް ބިން ކުއްޔަށް ދިނުމުގެ އެއްބަސްވުމުގައި ސިނާޢަތް ޤާއިމުކުރަންޖެހޭ ވަކި މުއްދަތެއް ބަޔާންކޮށްފައި ނެތްއިރު، ކުއްޔަށް ހިފި ފަރާތުން ގާތްގަނޑަކަށް 10 އަހަރު ވަންދެން ސިނާޢަތް ޤާއިމުނުކުރުމަކީ އެއްބަސްވުމާ ޚިލާފުވުމެއްތޯއާއި، ކުރިން އިޞްލާޙުކުރުމަށް އެންގުމެއް ނެތި ކުއްޔަށްދިން ފަރާތުން އެއްބަސްވުން ނިމުމަކަށް ގެނައުމަކީ އެއްބަސްވުމާ އެއްގޮތަށް ކުރެވުނު ޢަމަލެއްތޯ.

ދަށުކޯޓުގެ ޙުކުމް ބާޠިލު

ސިނާޢަތް ޤާއިމުކުރުމަކީ ކުއްޔަށް ހިފި ފަރާތުގެ ލާޒިމެއް އަދި އެއްބަސްވުމުގެ މައިގަނޑު މަޤްޞަދު ކަމަށާއި، މުއްދަތެއް ނެތުމުން ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 20 ވަނަ މާއްދާގެ (ނ) ގެ ދަށުން އެކަށީގެންވާ މުއްދަތަށް ބަލަންޖެހޭއިރު 10 އަހަރަކީ އެކަށީގެންވާ މުއްދަތެއް ކަމަށާއި، އެއްބަސްވުމުގެ 16 ވަނަ މާއްދާގެ އެންގުމަކީ ލާޒިމް ކަމެއް ނޫންކަމަށް ހައިކޯޓުން ކަނޑައަޅައި ދަށުކޯޓުގެ ޙުކުމް ބާޠިލުކުރިއެވެ.