2015/HC-A/293

ކްރިމިނަލް ކޯޓުން ޓެރަރިޒަމްގެ ކުށް ސާބިތުވާކަމަށް ކަނޑައަޅައި، ދެމީހުންކުރެ ކޮންމެ މީހަކު އުމުރަށް ޖަލަށް ލުމަށް ޙުކުމްކުރިއެވެ.

ތުހުމަތުކުރެވޭ ދެފަރާތާއި އިތުރު މީހަކު ވައްކަންކުރުމަށް ރާވައި، ނިދާފައި އޮތް މީހެއްގެ ގެއަށް ވަދެ، އޭނާގެ އަނގަމަތީގައި ޓީޝާޓެއް އަޅައި، އަތްފައި ޓޭޕުން ބަނދެ ރަހީނުކޮށް ފައިސާ ނަގައިގެން ދިއުމުން އެމީހާ ނޭވާ ހާސްވެ މަރުވި ކަމަށް ޓެރަރިޒަމްގެ ދަޢުވާ ކުރެވުނެވެ. ދެމީހުން ތަޙްޤީޤުގައި އިޢުތިރާފުވެ، ޝަރީޢަތުގައި އިންކާރުކުރިއެވެ.

އިސްތިއުނާފުކުރި ފަރާތްތަކުން ބުނީ ހެކި ވަޒަންކުރުމުގައި ޤާނޫނުއަސާސީގެ 52 ވަނަ މާއްދާއާ ޚިލާފުވެފައިވާކަމަށާއި، ބައިވެރިއެއްގެ މައްޗަށް ޖުވެނައިލް ކޯޓުން ކުރި ނިންމުމަށް ރިޢާޔަތް ނުކުރުމަކީ ކޯޓުތަކުގެ ޤާނޫނާއި ފަނޑިޔާރުންގެ ޤާނޫނާ ޚިލާފު ކަމެއްކަމަށާއި، ޓެރަރިޒަމްގެ ޢަމަލެއް ހިންގިކަން ޝައްކެއް ނެތް މިންވަރަށް ސާބިތުނުވާ ކަމަށެވެ. ތަޙްޤީޤު ބަޔާން ނަގާފައިވަނީ ބިރުދައްކައި މަޖްބޫރުކޮށްގެން ކަމަށްވެސް ބުނެފައިވެއެވެ.

ތަޙްޤީޤުގައި ވެފައިވާ އިޢުތިރާފަށް ޝަރީޢަތުގައި އިންކާރުކުރުމުން، އެ އިޢުތިރާފާއި އެހެން ހެކި ޤަރީނާގެ މައްޗަށް ޓެރަރިޒަމްގެ ކުށް ޝައްކެއް ނެތް މިންވަރަށް ސާބިތުވޭތޯއާއި، ޖުވެނައިލް ކޯޓުން ބައިވެރިއެއްގެ މައްޗަށް ނިންމި ނިންމުމަށް ކްރިމިނަލް ކޯޓުން ރިޢާޔަތްކުރަން ޖެހޭތޯއާއި، ޤަޞްދުގައި މީހަކު މެރުމުގެ ދަޢުވާ ޓެރަރިޒަމްގެ ދަޢުވާއަކަށް ބަދަލުކުރުން ޤާނޫނާ އެއްގޮތްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ތަޙްޤީޤު ބަޔާން މަޖްބޫރުކޮށްގެން ނެގިކަމުގެ ހެއްކެއް ނެތުމާއި، އިޢުތިރާފަށް ތާކީދުދޭ ހެކިބަހާއި ސޮއިހިފި ފައިސާއާއި ކަށިގަނޑާއި މެޑިކޯ ލީގަލް ރިޕޯޓާއި ވީޑިއޯ ރިކޯޑިންގ ހުރުމުން ކުށް ސާބިތުވާކަމަށް ކޯޓުން ކަނޑައެޅިއެވެ. ސުޕީރިއަރ ކޯޓުތަކުގެ ނިންމުމަކަށް އަނެއް ކޯޓު ތަބާވުން ލާޒިމު ނުވާކަމާއި ދަޢުވާ ބަދަލުކުރުމަކީ ޕީޖީއަށް ލިބިދޭ ބާރެއްކަމަށް ކަނޑައެޅިއެވެ.