2015/HC-A/270

ޖުވެނައިލް ކޯޓުން ކުށް ޝައްކެއްނެތް މިންވަރަށް ސާބިތުވާކަމަށް ކަނޑައަޅައި، 16 އަހަރާއި 8 މަސްދުވަހުގެ ޖަލު ޙުކުމް ކުރިއެވެ.

ބަޔަކާއެކު ބައިވެރިވެގެން ސައިކަލުގައި ދަތުރުކުރަމުން ދިޔަ މީހަކަށް ލަކުޑިބުރިއާއި ދަގަނޑުބުރިން ޙަމަލާދީ އެމީހާ ނިޔާވުމުން، ޤާނޫނު ނަންބަރު 10/90 ގެ 2(ހ) އާއި 6(ހ) ގެ ދަށުން ޓެރަރިޒަމްގެ ދަޢުވާ ކުރެވުނެވެ. ކުށުގެ ހާދިސާ ހިނގިއިރު ތުހުމަތުކުރެވޭ ފަރާތަކީ ކުއްޖެކެވެ.

އިސްތިއުނާފުކުރި ފަރާތުން ބުނީ ހެކިބަސްތަކުގައި ބޮޑެތި ފުށުއެރުން ހުރިކަމަށާއި، އެއް ހެކިވެރިއެއްގެ ބަހަށް އެކަނި ރިޢާޔަތްކުރި ކަމަށާއި، އެހެން ދަޢުވާލިބޭ ފަރާތެއްގެ ތަޙުޤީޤު ބަޔާން ހެއްކެއްގެ ގޮތުގައި ބެލި ކަމަށާއި، ސިޔާސީ މަޤްޞަދެއް ނުވަތަ ޢާންމުންގެ ހިތުގައި ބިރުވެރިކަން އުފެއްދުމުގެ މަޤްޞަދު ސާބިތުވާ ހެއްކެއް ނެތް ކަމަށެވެ.

ހެކިންގެ ހެކިބަހުގައި ފުށުއެރުން ހުރިތޯއާއި، އެއް ދަޢުވާލިބޭ ފަރާތެއްގެ ތަޙުޤީޤު ބަޔާން އަނެއް ފަރާތާ ދެކޮޅަށް ބެލުމުގެ މައްސަލައާއި، ބަޔަކު ރާވައިގެން ހަމަލާދީ މީހަކު މަރާލި ޢަމަލަކީ ޤާނޫނު ނަންބަރު 10/90 ގެ 2 ވަނަ މާއްދާގެ (ހ) ގައިވާ ޓެރަރިޒަމްގެ ޢަމަލެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައިކޯޓަށް ފެނުނީ ހެކިބަސްތަކުގައި ބުނާފަދަ ފުށުއެރުމެއް ނެތްކަމާއި، ރާވައިގެން ބިރުވެރިކަން އުފެދޭ ގޮތަށް ހިންގި ޢަމަލަކީ 2(ހ) ގެ ޓެރަރިޒަމްގެ ޢަމަލެއްކަމާއި، ތަޙުޤީޤު ބަޔާން ނުބެލިނަމަވެސް އެހެން ހެކި ޤަރީނާއިން ކުށް ސާބިތުވާކަމެވެ.