އަޙްމަދު ވ. ޕްރޮސިކިއުޓަރ ޖެނެރަލް

ވިލިނގިލި މެޖިސްޓްރޭޓް ކޯޓުން ކުއްޖާގެ ހެކިބަސް އާދަޔާ ޚިލާފަށް ތެދު ކަމަށް ބަލައި ދަޢުވާ ސާބިތުކޮށް 15 އަހަރުގެ ޖަލު ޙުކުމް ކުރިއެވެ.

އިސްތިއުނާފުކުރާ ފަރާތް، އޭނާއާއެކު އެއް ގޭގައި އުޅުނު، އަނބިމީހާގެ ކޮއްކޮގެ ކުއްޖަކާއެކު 2013 ން ފެށިގެން ޖިންސީ ޢަމަލު ހިންގި ކަމުގެ ދަޢުވާއެކެވެ.

އިސްތިއުނާފުކުރާ ފަރާތުން ބުނީ ލިބިފައިވަނީ 2 ހެކި އެކަނި ކަމަށާއި، ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގެ ހެކި ހަމަނުވާ ކަމަށާއި، ކުއްޖާ ދޮގު ތުހުމަތެއް އެޅުވި ކަމަށާއި، ބައެއް ހެކިން ޙާޟިރުނުކުރި ކަމަށެވެ.

އިތުބާރުކުރެވޭ މަޤާމެއްގައި ހުރެ ކުޑަކުއްޖަކާއެކު ޖިންސީ ޢަމަލު ހިންގުމުގެ ދަޢުވާއެއްގައި، ޤާނޫނު ނަންބަރު 12/2009 ގެ 47 ވަނަ މާއްދާގައިވާ ބާވަތްތަކުގެ ތެރެއިން 5 ބާވަތެއްގެ ހެކި ހަމަނުވިނަމަވެސް ކުށް ސާބިތުކުރެވޭތޯ އަދި ހެކި ހާޒިރުނުކޮށް ނިންމުމަކީ ޙުކުމް ބާޠިލުކުރަންޖެހޭ ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުއްޖާގެ ތަފްޞީލީ ކިޔައިދިނުމާއި، ފެމިލީ ސެންޓަރުގެ ރިޕޯޓާއި، މެޑިކޯ ލީގަލް ރިޕޯޓާއި، ތުހުމަތުކުރެވޭ ފަރާތުގެ އިޢުތިރާފީ ބަޔާނާއި މޯބައިލް ފޮރެންސިކް ރިޕޯޓު ފަދަ ހެކިތަކުން ދަޢުވާ ސާބިތުވާ ވަރަށް ހެކި ލިބިފައިވާތީ ޙުކުމަށް ބަދަލު ނުގެނެވުނެވެ.