އަޙްމަދު ރިފްޝާން ވ. ޕްރޮސިކިއުޓަރ ޖެނެރަލް

ކުޑަހުވަދޫ މެޖިސްޓްރޭޓް ކޯޓުން، މުޖުތަމަޢުގެ ސަލާމަތާއި ރައްކާތެރިކަމަށާއި ހެކިބަސްދޭ ފަރާތަކަށް ނުފޫޒު ފޯރުވާފާނެތީ ޝަރީޢަތް ނިމެންދެން ނުވަތަ ކޯޓުން ވަކި ގޮތެއް އަންގަންދެން ރިމާންޑް ޖަލެއްގައި ބަންދުކުރަން އަމުރުކުރިއެވެ.

ކުޑަކުއްޖަކަށް ޖިންސީ ހާނިއްކަ ލިބެމުންދާ ކަމަށް ފެމިލީ އެންޑް ޗިލްޑްރަން ސަރވިސް ސެންޓަރުން ހުށަހެޅުމުން އިސްތިއުނާފުކުރި ފަރާތް ހައްޔަރުކޮށް، ތަޙްޤީޤު ނިމުމުން ޕްރޮސިކިއުޓަރ ޖެނެރަލް ދަޢުވާ ހުށަހަޅައި ޝަރީޢަތް ނިމެންދެން ބަންދުކުރުމަށް އެދުނެވެ.

އިސްތިއުނާފުކުރި ފަރާތުން ބުނީ، ޚާއްޞަ ޤާނޫނުގެ ބަންދާބެހޭ މާއްދާތަކާއި ޤާނޫނުއަސާސީގެ 16 ވަނަ މާއްދާއާ ޚިލާފަށް، މުޖުތަމަޢަށް ނުރައްކަލެއް ނުވަތަ ހެކިންނަށް ނުފޫޒު ފޯރުވާނެ ސަބަބެއް ނެތި އަމުރު ނެރުނު ކަމަށާއި، ސުޕްރީމް ކޯޓުގެ 2019/SC-A/77 ބަންދާބެހޭ މައްސަލައަކަށް ތަޠުބީޤު ނުކުރެވޭނެ ކަމަށެވެ. ޕްރޮސިކިއުޓަރ ޖެނެރަލުން ބުނީ ޢާއިލާއެއްގެ ތެރޭ ހިނގި ހާދިސާއަކަށްވާތީ ނުފޫޒު ފޯރުވުމުގެ އިޙްތިމާލު އޮތް ކަމަށާއި، މުޖުތަމަޢަށް ނުރައްކާތެރި ކަމަށެވެ.

ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަޞްދުގައި އަތްލުމުގެ ތުހުމަތުގައި ދަޢުވާ ހުށަހެޅުމަށްފަހު، ޝަރީޢަތް ނިމެންދެން ތުހުމަތުކުރެވޭ ފަރާތް ބަންދުކުރަން ދަށުކޯޓުން ނެރުނު އަމުރަކީ ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނާއި ޖިނާއީ އިޖުރާއަތުގެ ޤާނޫނާ އެއްގޮތް އަމުރެއްތޯ.

އިސްތިއުނާފު ބާޠިލް، ދަށުކޯޓުގެ ބަންދުގެ އަމުރު ޤާއިމް (ގިނަ ރައުޔުން)

ގިނަ ރައުޔުގައި، ޚާއްޞަ ޤާނޫނުން ބަންދުގެ ސަބަބުތައް އިފްތިރާޟްކޮށްފައިވާ ކަމަށާއި، ކުށުގެ ބާވަތާއި ހެކިތަކާއި ޢާއިލާއެއްގެ ތެރޭ ހިނގި ހާދިސާއަކަށްވުމަށް ބަލާއިރު ބަންދުގެ އަމުރު ޤާނޫނާ ޚިލާފު ނޫން ކަމަށް ބެލިއެވެ. ޚިލާފު ރައުޔުގައި، އަމުރު ނެރުނީ ކޮން އިޖުރާއަތެއްގެ ދަށުންކަމާއި ދަޢުވާ ކުރިއަށް ގެންދެވޭނެ ހެކި ހުރިތޯ ކަނޑައެޅިކަން ނޭނގޭތީ ދަށުކޯޓަށް ފޮނުވަން ޖެހޭ ކަމަށް ބެލިއެވެ.