އަޙްމަދު ރަޝީދު ވ. ޕްރޮސިކިއުޓަރ ޖެނެރަލް

ތިނަދޫ މެޖިސްޓްރޭޓް ކޯޓުން ކުށް ސާބިތުކޮށް، 80 އެތިފަހަރުން ޙައްދު ޖެހުމަށާއި، އޭގެ އިތުރުން ޖިނާޔަތުގެ 1 ވަނަ ދަރަޖައިގެ ކުށެއްގެ ގޮތުގައި 1 އަހަރާއި 7 މަހާއި 6 ދުވަހުގެ ޖަލު އަދަބު ކަނޑައެޅިއެވެ.

އިސްތިއުނާފުކުރި ފަރާތް ރެސްޓޯރެންޓެއްގައި، ވަކި މީހެއްގެ އަނބިމީހާގެ ބަނޑުގައި އޮތީ ފިރިމީހާގެ ދަރިއެއް ނޫން ކަމަށާއި އެހެން ވަކި މީހެއްގެ ދަރިއެއް ކަމަށް ބުނެ ޤަޛުފުކޮށްފައިވާތީ ޤާނޫނުލްޢުޤޫބާތުގެ 612 ވަނަ މާއްދާގެ ދަށުން ދައުލަތުން ދަޢުވާކުރި މައްސަލައެކެވެ.

އިސްތިއުނާފުކުރި ފަރާތުން ބުނީ ހެކިންގެ އަދަދާއި ސިޔާސީ ދެކޮޅުވެރިކަމުން ޝައްކު އުފެދޭ ކަމަށާއި، ބުނި ޢިބާރާތަކީ ޤަޛުފުގެ ޢިބާރާތެއް ނޫން ކަމަށާއި، ޖިނާއީ ނިޔަތް ސާބިތުނުވާ ކަމަށާއި، ޙައްދު ޤަރީނާއިން ސާބިތުކޮށްފައިވާ ކަމަށާއި، ޙައްދާއެކު ތަޢުޒީރީ އަދަބު ދިނުމަކީ 1205 (ހ) އާ ޚިލާފު ކަމަށެވެ.

ބަލިވެ އިން އަންހެނެއްގެ ބަނޑުގައި އޮތީ އޭނާގެ ފިރިމީހާގެ ދަރިއެއް ނޫން ކަމަށާއި ވަކި މީހެއްގެ ދަރިއެއް ކަމަށް ބުނުމުން ޤަޛުފުގެ ކުށް ސާބިތުވޭތޯއާއި، ދެ ހެކިންގެ ހެކިބަހުން ކުށް ސާބިތުކުރުމުގައި ހެކިންގެ އަދަދާއި ޝަރުޠުތަކާ ގުޅޭ ޝައްކު އުފެދޭތޯ؛ އަދި ޤަޛުފުގެ ޙައްދާއެކު ޤާނޫނުލްޢުޤޫބާތުގެ ދަށުން ޖަލު އަދަބު ކަނޑައެޅުން ޤާނޫނާ އެއްގޮތްތޯ.

ޤަޛުފުގެ ކުށް ސާބިތުވި ނިންމުން ޤާއިމް؛ ޙައްދާއެކު ކަނޑައެޅި ޖަލު އަދަބު އުނިކޮށް ބައެއް ބަދަލުކުރި

ސީދާ އަޑުއެހި ދެ ހެކިންގެ ސާފު ހެކިބަހުން ކުށް ސާބިތުވާކަމަށާއި، ދުރުގައި ތިބި ދިފާޢީ ހެކިންގެ ބަހުން އެ ނަފީ ނުވާކަމަށާއި، ނަސަބު ނަފީކޮށް ބުނާ ބަހަކީ ޤަޛުފުގެ ލަފްޒެއް ކަމަށް ކަނޑައެޅިއެވެ. އެހެންނަމަވެސް ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 1205 ވަނަ މާއްދާގެ ފަހު އިޞްލާޙާއެކު ކަނޑައަޅަންވާނީ އިސްލާމީ ޝަރީޢަތުގެ އަދަބު ކަމުން ޖަލު އަދަބު އުނިކުރެވުނެވެ.