2015/HC-A/53

ކްރިމިނަލް ކޯޓުން ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނު) ގެ 47 ވަނަ މާއްދާގައިވާ މިންވަރަށް ހެކި ލިބިފައިވާތީ ކުށް ސާބިތުވާކަމަށް ކަނޑައަޅައި 20 އަހަރުގެ ޖަލު ޙުކުމް ކުރިއެވެ.

ބައްޕަ އޭނާގެ ދެ ކުދިންނާމެދު ގަދަކަމުން ބަދުއަޚްލާޤީ ޢަމަލު ހިންގި ކަމަށް 12/2009 ގެ 15(ހ)، (ށ) ގެ ދަށުން ޢާއިލާގެ މެމްބަރަކާއެކު ޖިންސީ ޢަމަލެއް ހިންގުމުގެ ދަޢުވާ ކުރެވުނެވެ.

އިސްތިއުނާފުކުރި ފަރާތުން ބުނީ ކުދިން ވާހަކަ ކިޔައިދިނީ ހެކި އުފެއްދުމަށް ކަމަށާއި، ތަޙުޤީޤުކުރި އޮފިސަރާއި ޖެންޑަރ މިނިސްޓްރީގެ ހެކިވެރިޔާ ޢާއިލާއާ ގުޅުންހުރި، ދެކޮޅުވެރިކަން ހުރި ފަރާތްތައް ކަމަށާއި، ހެކިބަސްތަކުގައި ބޮޑެތި ފުށުއެރުން ހުރިކަމަށެވެ.

ޢާއިލާގެ މެމްބަރަކާއެކު ޖިންސީ ޢަމަލެއް ހިންގުމުގެ ކުށުގައި، ކުދިން ވާހަކަ ކިޔައިދިނުމަކީ ހެކި އުފެއްދުމުގެ މަޤްޞަދުގައި ކުރި ކަމެއްތޯއާއި، ހެކިވެރިންގެ ޢަދުލުވެރިކަމާއި ހެކިބަސްތަކުގެ ފުށުއެރުމާއި، 12/2009 ގެ 47 ވަނަ މާއްދާގައިވާ ހެކިތަކާއި ޝައްކެއްނެތް މިންވަރުގެ ގުޅުން.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައިކޯޓަށް ފެނުނީ ކިޔައިދިނުމަކީ ހެކި އުފެއްދުމަށް ކުރި ކަމެއްކަމަށް ބެލެވޭނެ ހަމައެއް ނެތްކަމާއި، ހެކިވެރިންގެ ޢަދުލުވެރިކަމާމެދު ޝައްކުކުރާނެ ސަބަބެއް ނެތްކަމާއި، ފުށުއެރުމެއް ނެތްކަމާއި، ހުރިހާ ހެކި ގުޅުވާލުމުން ޝައްކެއްނެތް މިންވަރަށް ކުށް ސާބިތުވާކަމެވެ.