ޝަޒްބާން ފަހުމީ ވ. މަޢުރޫފް ޢާމިރު

ސިވިލް ކޯޓުން 672,000 ރުފިޔާ ދައްކައި ދަރަނި ޚަލާޞްކުރުމަށާއި، އެޕާޓްމަންޓްތައް 15 ދުވަހުގެ ތެރޭގައި ހުސްކޮށް ކުއްޔަށްދިން ފަރާތާ ޙަވާލުކުރުމަށް ޙުކުމްކުރިއެވެ.

ކުއްޔަށް ދިނުމުގެ އެއްބަސްވުމެއްގެ ދަށުން ގެއެއްގެ 4 އެޕާޓްމަންޓް 4 އަހަރަށް ކުއްޔަށް ދިނުމުން، ކުއްޔަށް ހިފި ފަރާތުން އެއްބަސްވުމުގައިވާ ކުލީގެ ބަދަލުގައި މަހަކު 12,000 ރުފިޔާ ދައްކަމުން ގޮސްފައިވެއެވެ. ކުއްޔަށްދިން ފަރާތަކީ ތަނުގެ ވެރިފަރާތާ ދިގު މުއްދަތަށް ކުއްޔަށް ހިފި ފަރާތެކެވެ.

އިސްތިއުނާފުކުރި ފަރާތުން ބުނީ ކުއްޔަށްދިން ފަރާތުން ތަން ފުރިހަމަކޮށް ވަގުތުން ޙަވާލުނުކޮށް އެއްބަސްވުމާ ޚިލާފުވިއިރު އެކަމުގެ ހެކިތަކަށް ރިޢާޔަތްނުކުރި ކަމަށާއި، ވެރިފަރާތާ ދެމެދުގެ އެއްބަސްވުން ބާޠިލުވެފައިވާތީ ތަން ޙަވާލުކުރުމަށް ޙުކުމްކުރެވޭނެ ޤާނޫނީ ހައިޘިއްޔަތެއް ނެތް ކަމަށެވެ.

ކުލީގެ އެއްބަސްވުމުގެ ދަށުން އެޕާޓްމަންޓްތައް ފުރިހަމަކޮށް ވަގުތުން ޙަވާލުނުކުރުމަކީ ކުއްޔަށްދިން ފަރާތުން އެއްބަސްވުމާ ޚިލާފުވުމެއްތޯއާއި، ކުއްޔަށް ހިފި ފަރާތުގެ ހެކި ދަށުކޯޓުން ބެލި ގޮތް ޞައްޙަތޯ؛ އަދި ތަނުގެ ވެރިފަރާތާ ކުއްޔަށްދިން ފަރާތާ ދެމެދުގެ އެއްބަސްވުން ބާޠިލުވެފައިވާ ކަމަށް ބުނާ ޙާލަތުގައި ތަން ހުސްކޮށް ކުއްޔަށްދިން ފަރާތާ ޙަވާލުކުރުމަށް ކުރި ޙުކުމް ޞައްޙަތޯ.

އިސްތިއުނާފު ބާޠިލު، ދަށުކޯޓުގެ ޙުކުމް ޤާއިމް

ކުލީގެ މުއްދަތު ފެށޭނީ ޙަވާލުކުރާ ދުވަހުން ކަމަށް އެއްބަސްވުމުގައިވާތީ ލަސްވުމަކީ ޚިލާފުވުމެއް ނޫންކަމާއި، ހެކިބަހުން ތަން ފުރިހަމަކޮށް ޙަވާލުކުރިކަން އެނގޭކަމާއި، އަނގަބަހުން ކުލި ބަދަލުކުރިކަން ސާބިތުނުވާކަމާއި، ތަން ހުސްކޮށް ވެރިފަރާތާ ޙަވާލުކުރުމަކީ ކުއްޔަށްދިން ފަރާތުގެ ޒިންމާ ކަމުން ދަށުކޯޓުގެ ޙުކުމަށް ބަދަލުގެންނަން ސަބަބެއް ނެތެވެ.