ޖާވީދު ޢަބްދުލްޙަކީމް ވ. ޢަޒީޒާ އަޙްމަދު

ސިވިލް ކޯޓުން، އެގްރީމެންޓާ ޚިލާފަށް ތަން ބަންދުކޮށްފައިވާކަން ސާބިތުވާތީ އެގްރީމެންޓާ އެއްގޮތަށް ޢަމަލުކުރުމަށާއި، ތަން ބޭނުން ނުކުރެވިވާ 9 އަހަރާއި 8 މަސްދުވަހުގެ މުއްދަތަށް ތަން ބޭނުންކުރުމުގެ ޙައްޤު ކުއްޔަށް ހިފި ފަރާތަށް ލިބޭކަމަށް ކަނޑައަޅައި، 7 ދުވަހުގެ ތެރޭގައި ތަޅުދަނޑިތައް ޙަވާލުކުރުމަށް ޙުކުމްކުރިއެވެ.

ގޯތިން އިސްތިއުނާފުކުރި ފަރާތަށް ލިބިފައިވާ ބައިގެ ޢިމާރާތުގެ ފުރަތަމަ އަދި ދެވަނަ ބުރި 10 އަހަރަށް ކުއްޔަށް ދިނުމަށް 25 ޖެނުއަރީ 2011 ގައި ސިވިލް ކޯޓުގައި ރަޖިސްޓްރީކުރި އެއްބަސްވުމެއް ހެދުނެވެ. ކުއްޔަށްދިން ފަރާތުން ތަނުގެ ތަޅު ބަދަލުކޮށް ބަންދުކުރުމުން ކުއްޔަށް ހިފި ފަރާތުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ޢިމާރާތް ހެދީ އެއްބަސްވުމުގެ ކުރިން ކަމަށާއި، ކުއްޔަށް ހިފި ފަރާތުން އެއްވެސް ޚަރަދެއް ނުކުރާކަމަށާއި، ރަޖިސްޓްރީކުރި އެއްބަސްވުމަކީ ކިޔައިނުލައި ސޮއިކުރި، ކުލި 5000 އިން 500 އަށް ބަދަލުކޮށް އޮޅުވާލާފައިވާ ބާޠިލް އެއްބަސްވުމެއްކަމަށާއި، ކައުންސިލްގެ ސިޓީއަށް ރިޢާޔަތްނުކުރާކަމަށެވެ.

ސިވިލް ކޯޓުގައި ރަޖިސްޓްރީކޮށްފައިވާ ކުލި އެއްބަސްވުމެއް ކިޔައިނުލައި ސޮއިކުރިކަމަށާއި އޮޅުވާލައިގެން ބަދަލުގެނެސްފައިވާކަމަށް ބުނެ އެ އެއްބަސްވުމުން ބޭރުވެވޭނެތޯއާއި، ކުއްޔަށް ހިފި ފަރާތަށް ތަން ބޭނުން ނުކުރެވޭގޮތަށް ތަޅުލުމަކީ އެއްބަސްވުމާ ޚިލާފުވުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހެކިބަހުން ކުއްޔަށް ހިފި ފަރާތުން ޢިމާރާތަށް ޚަރަދުކޮށްފައިވާކަން އެނގޭތީއާއި، ރަޖިސްޓްރީ ކުރިމަތީގައި ސޮއިކޮށް އިނގިލީގެ ނިޝާން ޖަހާފައިވާ އެއްބަސްވުމުގެ ޚިލާފަށް އޮޅުވާލުން ސާބިތުކުރުމުގެ ބުރަ އުފުލިފައި ނުވާތީ، އެއްބަސްވުމަށް ޢަމަލުކުރުން ލާޒިމްވާކަމަށާއި، ތަޅުލުމަކީ އެއްބަސްވުމާ ޚިލާފުވުމެއްކަމަށް ކަނޑައަޅައި ދަށުކޯޓުގެ ޙުކުމް ޤާއިމްކުރިއެވެ.