ޝަކީލާ އިބްރާހީމްދީދީ ވ. ޢަލީ ޝަކީބް

ސިވިލް ކޯޓުން ދަޢުވާލިބޭ ފަރާތުގެ ޣައިރު ޙާޟިރުގައި 175,000 ރުފިޔާ 15 ދުވަހުގެ ތެރޭގައި ދެއްކުމަށް ޙުކުމްކޮށް، ގެއްލުމުގެ ބަދަލާއި ޤާނޫނީ ޚަރަދު ނަގައިނުދިނެވެ.

ފްލޯރެއް 10 އަހަރަށް ކުއްޔަށްދިނުމަށް އެޑްވާންސް ކުލީގެ ގޮތުގައި 500,000 ރުފިޔާ ދިނުމަށްފަހު، 2017 ގައި އެއްބަސްވުން ބާޠިލުކޮށް ބާކީ 350,000 ރުފިޔާ 2018 ފެބުރުއަރީ ނިޔަލަށް އަނބުރާ ދެއްކުމަށް އެއްބަސްވިއެވެ. ދިން ޗެކު ބައުންސްވެ 175,000 ރުފިޔާ ނުލިބުމުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ފޯނުން ގުޅައި އަޑުއެހުމަކަށް އެދުނު ނަމަވެސް އަޑުއެހުމެއްނެތި ޣައިރު ޙާޟިރުގައި ނިންމީ ފަނޑިޔާރުންގެ ޤާނޫނާ ޚިލާފަށްކަމަށާއި، މާލީ ޤާބިލްކަން ނުބަލައި 15 ދުވަސް ދިނުމަކީ ޤާނޫނުއަސާސީގެ 42 ވަނަ މާއްދާއާ ޚިލާފުކަމަށާއި 14 މަހަށް ބަހާލަން ޖެހޭކަމަށެވެ.

ކޯޓަށް ޙާޟިރުވުމުގެ އަމުރު ރައްދުވެފައިވާ ދަޢުވާލިބޭ ފަރާތުގެ ޣައިރު ޙާޟިރުގައި ޙުކުމްކުރުމަކީ ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) ގެ (1) އާ ޚިލާފު ކަމެއްތޯ؛ އަދި ފައިސާ ދެއްކުމަށް 15 ދުވަހުގެ މުއްދަތު ދިނުމަކީ ޤާނޫނުއަސާސީގެ 42 ވަނަ މާއްދާއާ ޚިލާފު، ޢަދުލުވެރި ނޫން ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޙާޟިރުވުމުގެ އަމުރު ރައްދުވެފައިވާއިރު ޢުޛުރެއްނެތި ޙާޟިރުނުވުމުން ޣައިރު ޙާޟިރުގައި ނިންމުމަކީ ޤަވާޢިދާ އެއްގޮތް ކަމެއްކަމާއި، އެއްބަސްވި މުއްދަތު ފާއިތުވެ ފައިސާ ނުދައްކާއިރު ޙައްޤު އެންމެ އަވަހަށް ލިބިދިނުމުގެ އުޞޫލުން 15 ދުވަސް ދިނުމަކީ ޤާނޫނުއަސާސީއާ ޚިލާފު ކަމެއް ނޫންކަމަށް ކަނޑައެޅިއެވެ.