ޕްރޮސިކިއުޓަރ ޖެނެރަލް ވ. ސާޒު ޝަރީފް

މެޖިސްޓްރޭޓް ކޯޓުން އިޢުތިރާފުގެ މައްޗަށް ކުށް ސާބިތުކޮށް، ފުރަތަމަ ފަހަރު ކަމުން 1 އަހަރުގެ ގޭބަންދާއި 100 އެތިފަހަރުގެ ޖަލްދަށް ޙުކުމްކުރިއެވެ.

ކާވެނިން ބޭރުން ކުއްޖަކު ލިބުމާ ގުޅިގެން ތުހުމަތުކުރެވޭ ފަރާތް ޒިނޭގެ ކުށަށް ޝަރީޢަތުގައި އިޢުތިރާފުވުމުން ދައުލަތުން ދަޢުވާކުރި މައްސަލައެކެވެ.

ޕީޖީއިން އެދުނީ އިޢުތިރާފު ޞައްޙަކަމާއި، ޤާނޫނުއަސާސީގެ ޙައްޤުތައް ދީފައިވާކަމާއި، ޙައްދު ޖެހުން މަނާކުރާ ސަބަބެއް ނެތްކަން ކަށަވަރުކޮށްދިނުމަށެވެ. ތުހުމަތުކުރެވޭ ފަރާތުން ބުނީ ވަކީލުގެ ފުރުޞަތު ދޫކޮށްލި ކަމަށާއި، އިޢުތިރާފުވީ މަޖުބޫރުކަމެއް ނެތި ކަމަށާއި، މިހާރު ގޭބަންދުގައި ހުރި ކަމަށެވެ.

ޒިނޭގެ ކުށަށް ޝަރީޢަތުގައި ވި އިޢުތިރާފުގެ މައްޗަށް ކުށް ސާބިތުކޮށް ޙައްދާއި ގޭބަންދު ކަނޑައެޅި މެޖިސްޓްރޭޓް ކޯޓުގެ ޙުކުމް ޞައްޙަތޯއާއި، ޝަރީޢަތުގެ ހުރިހާ މަރުޙަލާއެއް ނިމުމުގެ ކުރިން އެ ޙުކުމް ތަންފީޛުކުރެވިދާނެތޯ.

ދަށުކޯޓުގެ ޙުކުމް ޞައްޙަކަމަށް ކަނޑައެޅި؛ ނިހާއީވުމުގެ ކުރިން ތަންފީޛު ނުކުރުމަށް އެންގި

ޙައްޤުތައް ދީފައިވުމާއި، އިޢުތިރާފުގެ ޝަރުޠުތައް ފުރިހަމަވެ ރުޖޫޢު ނުވުމާއި، ޙައްދު މަނާކުރާ ސަބަބެއް ނުބުނުމުން ޙުކުމް ޞައްޙަކޮށް، ޤާނޫނުލްޢުޤޫބާތުގެ 1205 ވަނަ މާއްދާއާއި ސަރކިއުލަރގެ ދަށުން ނިހާއީވުމުގެ ކުރިން ތަންފީޛު ނުކުރުމަށް އެންގިއެވެ.