ޕްރޮސިކިއުޓަރ ޖެނެރަލް ވ. ރިފާޢު މުހައްމަދު

ކްރިމިނަލް ކޯޓުން ޝަރީޢަތް ނިމެންދެން ބަންދުކުރުމުގެ އަމުރު ބާޠިލުކޮށް ތުހުމަތުކުރެވޭ ފަރާތް ބަންދުން ދޫކޮށްލި.

ގުރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި ތުހުމަތުގައި ކްރިމިނަލް ކޯޓުގެ 145-J/MD/2015/8456 އަމުރުން 2015 ވަނަ އަހަރު ޝަރީޢަތް ނިމެންދެން ބަންދުކުރި ފަރާތެއްގެ ދަޢުވާގެ ހެކިބަސް ނަގައި ނިމި ޚުލާޞާ ބަޔާން ހުށަހަޅަން އޮއްވާ، ޝަރީޢަތުގެ އަޑުއެހުންތައް ގިނަ ދުވަސްތަކަކަށް މެދުކެނޑިފައި ވަނިކޮށް، އޭނާ ބަންދުން ދޫކޮށްލުމަށް ކްރިމިނަލް ކޯޓުން އަމުރުކުރި.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 59 އަދި 60(ށ) ވަނަ މާއްދާއާއި، ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 12 އަދި 16 ވަނަ މާއްދާއާ ޚިލާފު އަމުރެއް ކަމަށާއި، މަތީ ކޯޓުތަކުގެ ނިންމުންތަކަށް ތަބާނުވެ ނެރުއްވި އަމުރެއް ކަމަށެވެ.

ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ތުހުމަތުގައި ޝަރީޢަތް ނިމެންދެން ބަންދުގައި ބަހައްޓާފައިވާ ފަރާތެއް، ބަންދުގައި އިތުރަށް ނުބެހެއްޓޭ ސަބަބު ބަޔާންނުކޮށް އަދި ކޯޓަށް ޙާޟިރުވާނެކަން ކަށަވަރުކުރާ ފިޔަވަޅެއް ނާޅައި ބަންދުން ދޫކޮށްލުމަށް ނެރުއްވި އަމުރު ޤާނޫނާ އެއްގޮތްތޯ.

ދަށުކޯޓުގެ އަމުރު ބާޠިލު؛ ބަންދަށް އެދި ޕްރޮސިކިއުޓަރ ޖެނެރަލް ހުށަހަޅައިފިނަމަ ކްރިމިނަލް ކޯޓުން އަލުން ގޮތެއް ނިންމަންޖެހޭ

އަޑުއެހުންތައް މެދުކެނޑި ގިނަ ދުވަސްވުމުން ބަންދަށް ލުޔެއް ދެވިދާނެ ނަމަވެސް، ނުރައްކާތެރި ކުށެއްގެ ތުހުމަތުގައިވާ ފަރާތަކަށް ލުޔެއްދޭއިރު ކޯޓަށް ޙާޟިރުވާނެކަން ކަށަވަރުކުރާ ފިޔަވަޅު އަޅަންވާނެ ކަމަށާއި، ދޫކޮށްލާ ސަބަބު އަމުރުގައި ބަޔާންކުރަންވާނެ ކަމަށާއި، މި އަމުރުގައި އެ ދެކަމެއް ވެސް ނެތުމުން އަމުރު ބާޠިލުކޮށް، ބަންދާމެދު ގޮތެއް ނިންމަންޖެހޭނީ މައްސަލަ ބައްލަވާ ކޯޓުން ކަމަށް ހައިކޯޓުން ކަނޑައެޅި.