ޕްރޮސިކިއުޓަރ ޖެނެރަލް ވ. ނޫރާ މޫސާ

ކްރިމިނަލް ކޯޓުން ތަޙްޤީޤުގައި ޖިނާއީ އިޖުރާއަތުގެ ޤާނޫނުގެ 38 ވަނަ މާއްދާއާ ޚިލާފަށް ޢަމަލުކޮށްފައިވާތީ، ޤާނޫނުއަސާސީގެ 52 ވަނަ މާއްދާއާއި 2017/HC-A/189 އަށް ރިޢާޔަތްކޮށް ދަޢުވާ ސާބިތުނުވާކަމަށް ޙުކުމްކުރި.

ޖަލަށް މަސްތުވާތަކެތި ވެއްދުމަށް އުޅޭކަމުގެ މަޢުލޫމާތާ ގުޅިގެން ތުހުމަތުކުރެވޭ ފަރާތް ފުލުހުންގެ ބެލުމުގެ ދަށަށް ގެނެސް، ކޯޓު އަމުރެއްގެ ދަށުން ހަށިގަނޑު ބަލައި ފާސްކުރުމުން ދެ ކޮންޑަމެއްގެ ތެރެއިން ޖުމުލަ ގާތްގަނޑަކަށް 19 ގްރާމް ޑައިމޯފިން ފެނުނު. ޕޮލިސް ސްޓޭޝަނުގައި އަންހެން ފުލުހަކު ނެތުމުން ބަލައި ފާސްކުރީ ކަރެކްޝަނަލް ސަރވިސްގެ އަންހެން އޮފިސަރުން.

ދައުލަތުން ބުނީ 38 (ވ) ގައި އެއް ޖިންސުގެ 'މީހަކު' ކަމަށް ބުނެފައިވާތީ ފުލުހަކަށްވުން ލާޒިމުނުވާކަމަށާއި ބަލައި ފާސްކުރީ ފުލުހުންގެ އިރުޝާދުގެ މަތިން ކަމަށް. ދިފާޢުން ބުނީ ބަލައި ފާސްކުރުމުގެ ބާރު ލިބިގެންވަނީ ފުލުހުންނަށް ކަމަށާއި، ކަރެކްޝަނުގެ މުވައްޒަފުންނަށް ފުލުހުންގެ ތަނުގައި ބަލައި ފާސްކުރުމުގެ ހުއްދައެއް ނެތްކަމަށް.

ކޯޓު އަމުރެއްގެ ދަށުން އަންހެނަކު ބަލައި ފާސްކުރުމުގައި ފުލުހުންގެ އަންހެން އޮފިސަރަކު ނެތުމުން މޯލްޑިވްސް ކަރެކްޝަނަލް ސަރވިސްގެ އަންހެން އޮފިސަރުން ލައްވާ ބަލައި ފާސްކުރުމަކީ ޖިނާއީ އިޖުރާއަތުގެ ޤާނޫނުގެ 38 ވަނަ މާއްދާގެ (ވ) އާ ޚިލާފު ކަމެއްތޯ، އަދި އެ ސަބަބުން ޑައިމޯފިން ޓްރެފިކްކުރުމުގެ ދަޢުވާ ސާބިތުނުވާކަމަށް ކްރިމިނަލް ކޯޓުން ކުރި ޙުކުމް ޞައްޙަތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ފޮނުވި

ބަލައި ފާސްކުރީ ކޯޓު އަމުރެއްގެ ދަށުން، ބަންދުގައި ނޫން ހުރި މީހެއް ކަމުން ހިނގަނީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 38 ވަނަ މާއްދާ ކަމަށާއި، އެ މާއްދާގައި އެއް ޖިންސުގެ މީހަކު ހާޒިރުކުރުމަށް ހުއްދަ ދޭތީއާއި، ކަރެކްޝަނުގެ އޮފިސަރުންނަކީ ބަލައި ފާސްކުރުމުގެ ތަމްރީނު ލިބިފައިވާ ބަޔަކު ކަމުން، 38 (ވ) އާ ޚިލާފެއް ނުވާކަމަށް ކަނޑައަޅައި ނިންމުން ބާޠިލުކޮށް މައްސަލަ ތަޙްވީލުކުރި.