ޕްރޮސިކިއުޓަރ ޖެނެރަލް ވ. ނަޛީޙު ޙިލްމީ

ގއ. ގެމަނަފުށީ މެޖިސްޓްރޭޓް ކޯޓުން، ޝަރީޢަތް ނިމެންދެން ބަންދުކުރިއިރު އޮތް ޙާލަތު މިހާރު ދެމިއޮތްކަމަށް ނުފެންނާތީ، ޝަރީޢަތް ގިނަ ދުވަސް ދެމިގެންދާތީ ފަދަ ކަންކަމަށް ބަލައި، ޝަރުޠުތަކާއެކު ބަންދުން ދޫކޮށްލުމަށް އަމުރުކުރިއެވެ.

މަސްތުވާތަކެތި ޓްރެފިކްކުރުމުގެ ތުހުމަތުގައި ހައްޔަރުކޮށް، މެޖިސްޓްރޭޓް ކޯޓުން މުޖުތަމަޢުގެ ސަލާމަތަށް ނުރައްކާވެދާނެތީ ޝަރީޢަތް ނިމެންދެން ބަންދުކުރުމަށް އަމުރުކޮށްފައިވިއެވެ. ބަންދު ދެމެހެއްޓުމަށް ދައުލަތުން އެދި މުރާޖަޢާއަށް ހުށަހެޅުމުން، ތުހުމަތުކުރެވޭ ފަރާތް ޝަރުޠުތަކާއެކު ދޫކޮށްލުމަށް އަމުރުކުރިއެވެ.

ދައުލަތުން ބުނީ ބަންދުކުރަންޖެހޭ ޙާލަތު އޮއްވާ، ޙާލަތު ބަދަލުވިގޮތް ބަޔާންނުކޮށް މަތީ ކޯޓުތަކުގެ ނިންމުންތަކާ ޚިލާފަށް ދޫކޮށްލާފައިވާ ކަމަށެވެ. ތުހުމަތުކުރެވޭ ފަރާތުން ބުނީ އަމުރު މަތީ ކޯޓުތަކުގެ ނިންމުންތަކާ ޚިލާފުކަން ޤަބޫލުކުރާ ނަމަވެސް، މަދު މިންވަރެއްގެ މަސްތުވާތަކެތި ފެންނަ ޙާލަތުގައި ބަންދު ނުކުރުމުގެ ދައުލަތުގެ އުޞޫލު ހަމަހަމަކޮށް ތަޠުބީޤުކުރަން ޖެހޭ ކަމަށެވެ.

މަސްތުވާތަކެތީގެ ޓްރެފިކިންގ ތުހުމަތުގައި ޝަރީޢަތް ނިމެންދެން ބަންދުކުރެވިފައިވާ ފަރާތެއް، ބަންދުކުރިއިރު އޮތް ޙާލަތު ބަދަލުވިގޮތް ބަޔާންނުކޮށް ޝަރުޠުތަކާއެކު ބަންދުން ދޫކޮށްލުމަށް މެޖިސްޓްރޭޓް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނާއި މަތީ ކޯޓުތަކުގެ ނިންމުންތަކާ އެއްގޮތަށް ނެރެވުނު އަމުރެއްތޯ.

ދަށުކޯޓުގެ އަމުރު ބާޠިލު، ބަންދާމެދު އަލުން ގޮތެއް ނިންމުމަށް ދަށުކޯޓަށް އެންގި

ދޫކޮށްލާއިރު ބަންދުކުރެވުނު ޙާލަތު ބަދަލުވިގޮތާއި ނިންމުމަށް ވާސިލުވި ސަބަބު ބަޔާންކުރަން ޖެހޭކަމަށް މަތީ ކޯޓުތަކުން ތަކުރާރުކޮށް ނިންމާފައިވާއިރު، ދަށުކޯޓުގެ އަމުރުގައި އެކަން ބަޔާންކޮށްފައިނުވާތީ އަމުރު ބާޠިލުކުރިއެވެ.