ޕްރޮސިކިއުޓަރ ޖެނެރަލް ވ. އަޙްމަދު އަމްނު

ބަންދު މުރާޖަޢާކުރުމަށް އެދުމުން ކްރިމިނަލް ކޯޓުން، މައްސަލަ ނިމެން ގިނަ ދުވަސް ނަގާނެތީއާއި، ތަކެތި އަތުން ނުފެނުމާއި ފޮރެންސިކް/ނޮލެޖްގެ ހެކި ނެތްކަމަށް ދިފާޢުން ބުނި ކަންކަމަށް ބުރަދަނެއް ހުރުމާއި، ހެކިތަކުގައި އިޖުރާއީ ގޯސްތައް ހުރުމާއި، ނެޓްވޯކްގެ ދައުރު ސާފުނުވުމާއި، އެހެން މައްސަލައެއްގައި ޖާގަ ނެތުމުން މީހަކު ދޫކުރުމަށް ބަލައި ޝަރުޠުތަކާއެކު ދޫކޮށްލިއެވެ.

ބަޔަކާ ބައިވެރިވެގެން މަސްތުވާތަކެތި އެތެރެކޮށް ވިޔަފާރިކުރާކަމަށް ތުހުމަތުކުރެވި 2022 ޑިސެންބަރުގައި ހައްޔަރުކުރެވުނު ފަރާތެއް، 06 ފެބުރުވަރީ 2023 ގައި ޝަރީޢަތް ނިމެންދެން ބަންދުކުރެވިފައިވިއެވެ.

ދައުލަތުން ބުނީ ބޮޑު ކުށެއްގެ ތުހުމަތު އޮތްއިރު ޙާލަތު ބަދަލުވި ގޮތެއް ނުބުނެ، ހެކި ވަޒަންކުރި ގޮތް ސާފުނުވެ، ޝަރީޢަތް ލަސްވާނެކަމަށް ބަލައި ދޫކުރީ ޤާނޫނާ ޚިލާފަށް ކަމަށެވެ. ރައްދުވާ ފަރާތުން ބުނީ ނޮލެޖްގެ ހެއްކާއި ޗެއިން އޮފް ކަސްޓަޑީ ހުށަހަޅާފައިނުވާތީ ޙާލަތު ބަދަލުވެފައިވާކަމަށާއި ކުށުގެ ބޮޑުކަމަކީ ބަންދުކުރާ ސަބަބެއް ނޫންކަމަށެވެ.

މަސްތުވާތަކެތި ޓްރެފިކްކުރުމުގެ ތުހުމަތުގައި ޝަރީޢަތް ނިމެންދެން ބަންދުކުރެވިފައިވާ މީހަކު، ބަންދު ހުރި ޙާލަތު ބަދަލުވިކަމަށް ބަލައި ޝަރުޠުތަކާއެކު ދޫކޮށްލި ކްރިމިނަލް ކޯޓުގެ އަމުރަކީ މައިގަނޑު ވާޤިޢާތަކަށް ރިޢާޔަތްކޮށް ނިންމި ޞައްޙަ އަމުރެއްތޯ.

ދަށުކޯޓުގެ އަމުރު ބާޠިލު، ބަންދާމެދު އަލުން ގޮތެއް ނިންމުމަށް ކްރިމިނަލް ކޯޓަށް އެންގި

ދައުލަތުން 6 ޝަފަހީ ހެކިވެރިންނާއި ތަޙުލީލީ ރިޕޯޓާއި ޗެއިން އޮފް ކަސްޓަޑީ ހާމަކޮށްފައިވާއިރު، ދިފާޢުގެ ކަންކަމަށް ބުރަދަން ދިން ސަބަބު ނުބުނެ، ހެކި ހުށަހެޅިފައިވޭތޯ ބެލުމެއްނެތި ޙާލަތު ބަދަލުވިކަމަށް ނިންމީ މައިގަނޑު ވާޤިޢާއަކަށް ރިޢާޔަތްނުކޮށް ކަމަށް ބެލިއެވެ.