ޕްރޮސިކިއުޓަރ ޖެނެރަލް ވ. ނަން ސިއްރުކުރެވިފައި

ޖުވެނައިލް ކޯޓުން ކުށް ސާބިތުކޮށް، ކުޑަކުދިންގެ ޢަދުލުގެ ޤާނޫނުގެ ތިންބައިކުޅަ ދެބައިގެ އުޞޫލަށް ރިޢާޔަތްކޮށް 3 އަހަރާއި 2 މަހާއި 27 ދުވަހުގެ ބަންދު ކަނޑައަޅައި، ޝަރުޠުތަކާއެކު ތަންފީޒުކުރުން ފަސްކުރި؛ ފަހުން ޝަރުޠު ފުރިހަމަކުރުމުން ޙުކުމް ތަންފީޒުކޮށް ނިމުނުކަމަށް ކަނޑައެޅި.

ކުޑަކުއްޖަކަށްވާ ތުހުމަތުކުރެވޭ ފަރާތް، އިތުރު މީހަކާއެކު، ކުޑަކުއްޖެއްގެ ނުރުހުމުގައި ޖިންސީ ޢަމަލެއް ހިންގިކަމަށް، ކުޑަކުއްޖެއްގެ ހަށިގަނޑުގައި ޖިންސީ ނިޔަތުގައި ޤަޞްދުގައި އަތްލުމުގެ ދަޢުވާ ދައުލަތުން އުފުލި.

ދައުލަތުން ބުނީ ޚާއްޞަ ޤާނޫނުގައި ކުޑަކުއްޖަކަށް ދޭނެ އަދަބު ކަނޑައަޅާފައިވާއިރު ޢާއްމު ޤާނޫނުގެ އުޞޫލުން އަދަބު ލުއިކުރުމަކީ ސުޕްރީމް ކޯޓުގެ ނިންމުންތަކާ ޚިލާފު ކަމަށެވެ. ތުހުމަތުކުރެވޭ ފަރާތުން ބުނީ ކުޑަކުދިންގެ ޢަދުލުގެ ޤާނޫނަށް އިސްކަންދޭންޖެހޭކަމަށާއި ޙުކުމް ތަންފީޒުކޮށް ނިމިފައިވާތީ އިތުރު އަދަބަކީ ދެ ފަހަރު އަދަބު ދިނުންކަމަށެވެ.

ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ ދަށުން ކުޑަކުއްޖަކު ކުރި ކުށަކަށް އަދަބު ކަނޑައަޅާއިރު، ކުޑަކުދިންގެ ޢަދުލުގެ ޤާނޫނުގައިވާ (އެންމެ ކުޑަ އަދަބުގެ ތިންބައިކުޅަ ދެބައި ކަނޑައަޅާ) ޢާއްމު އުޞޫލު ތަޠުބީޤުކުރެވޭނެތޯ، ނުވަތަ ޚާއްޞަ ޤާނޫނުގައިވާ އަދަބަށް އިސްކަންދޭންޖެހޭތޯ.

ދަށުކޯޓުން ކަނޑައެޅި އަދަބު ޚާއްޞަ ޤާނޫނާ ޚިލާފު؛ އަދަބު ކަނޑައަޅައި ތަންފީޒީ ކަންކަން ނިންމުމަށް ޖުވެނައިލް ކޯޓަށް ފޮނުވި

ކުޑަކުދިންގެ ޢަދުލުގެ ޤާނޫނުގެ އަދަބު ކަނޑައެޅުމުގެ މާއްދާއަކީ ޢާއްމު އިޖުރާއަތެއް؛ ޚާއްޞަ ޤާނޫނުގައި ކުޑަކުއްޖަކަށް ދޭނެ އަދަބު ކަނޑައަޅާފައިވާތީ، ސުޕްރީމް ކޯޓުގެ ނިންމުންތަކުގެ އަލީގައި ޚާއްޞަ ޤާނޫނަށް އިސްކަންދޭންޖެހޭ ކަމަށް ކޯޓުން ނިންމި.