ޕްރޮސިކިއުޓަރ ޖެނެރަލް ވ. އިބްރާހީމް އިރުފާން

ހަރުދަނާ ސަބަބެއް ނެތް ކަމަށާއި، މުޖުތަމަޢަށް ނުރައްކާތެރިކަމުގެ ހަރުދަނާ ހެކި ނެތް ކަމަށާއި، ކުށުގެ ރެކޯޑު ނެތް ކަމަށާއި، ހެކިންނަކީ ފުލުހުން ކަމުން ނުފޫޒު ފޯރުވުމުގެ އިޙްތިމާލެއް ނެތް ކަމަށް ބުނެ ކްރިމިނަލް ކޯޓުން ޝަރުޠުކޮށް ދޫކޮށްލިއެވެ.

މަސްތުވާތަކެތި ޓްރެފިކްކުރުމުގެ ތުހުމަތުގައި 2020 އޮގަސްޓުގައި ހައްޔަރުކުރި ދެ ފަރާތް ޝަރީޢަތް ނިމެންދެން ބަންދުކުރިއެވެ. ޖިނާއީ އިޖުރާއަތުގެ ޤާނޫނުގެ 3 ވަނަ އިޞްލާޙާ ގުޅިގެން ބަންދު މުރާޖަޢާކުރުމަށް އެދުމުން ކްރިމިނަލް ކޯޓުން ދެ ފަރާތް ޝަރުޠުކޮށް ދޫކޮށްލިއެވެ.

ޕްރޮސިކިއުޓަރ ޖެނެރަލްގެ އޮފީހުން ބުނީ އަމުރުތަކަކީ ޤާނޫނުއަސާސީގެ 49 އާއި 143(ރ) އާއި ޖިނާއީ އިޖުރާއަތުގެ ޤާނޫނުގެ 22(ކ)، 59، 60(ށ) އާ ޚިލާފު އަމުރުތަކެއް ކަމަށެވެ.

މަސްތުވާތަކެތި ޓްރެފިކްކުރުމުގެ ތުހުމަތުގައި ޝަރީޢަތް ނިމެންދެން ބަންދުގައި ތިބި ދެ ފަރާތް ޝަރުޠުކޮށް ދޫކޮށްލުމަށް ކްރިމިނަލް ކޯޓުން ނެރުނު އަމުރުތަކަކީ ޖިނާއީ އިޖުރާއަތުގެ ޤާނޫނާއި ޝަރީޢަތްކުރުމާބެހޭ ޖިނާއީ އިޖުރާއަތުގެ ގަވާއިދާ އެއްގޮތް އަމުރުތަކެއްތޯ.

ދަށުކޯޓުގެ އަމުރުތައް ބާޠިލު

ތުހުމަތުކުރެވޭ ކުށަކީ ޖިނާއީ ބޮޑު ކުށެއް ކަމާއި، އެކަށީގެންވާ ހެކި ލިބި ދަޢުވާ ހުށަހެޅިފައިވާކަމާއި، ކުރީގެ އަމުރުތަކުގައި ކުށުގެ ރެކޯޑު ހުރިކަން ބަޔާންކޮށްފައިވާކަމާއި، ކުށުގެ ބާވަތާއި ކުޑަބޮޑުމިނަށް ރިޢާޔަތްނުކުރާކަން ފާހަގަކޮށް އަމުރުތައް ބާޠިލުކުރިއެވެ.