ޕްރޮސިކިއުޓަރ ޖެނެރަލް ވ. ޢަލީ އަޙްމަދު ރެޑްރޯސް

ހައްޔަރުކުރެވޭ މީހާގެ މައްޗަށް ތުހުމަތުކުރެވޭ ކުށް ކަނޑައަޅާފައި ނެތުމާއި، ޓްރެފިކިންގއަށް ބެލެވޭ ބަރުދަން ނޭނގޭތީ ބަންދުގައި ބަހައްޓަންޖެހޭ ސަބަބެއް ނެތްކަމަށް ބުނެ، ޝަރުޠެއްނެތި ދޫކުރުމަށް މެޖިސްޓްރޭޓް ކޯޓުން އަމުރުކުރިއެވެ.

އިންޓެލިޖެންސް މަޢުލޫމާތާ ގުޅިގެން ގެއެއް ބަލައި ފާސްކުރުމުން މަސްތުވާތަކެތި ކަމަށް ޝައްކުކުރެވޭ އެއްޗެހި ފެނި، ތުހުމަތުކުރެވޭ ފަރާތް ހައްޔަރުކޮށް 15 ދުވަހަށް ބަންދުކުރިއެވެ. ބަންދު ދެވަނަ ފަހަރަށް އިތުރުކުރުމަށް ފުލުހުން އެދުނެވެ.

ޕްރޮސިކިއުޝަނުން ބުނީ އަމުރަކީ ޤާނޫނުއަސާސީގެ 49 ވަނަ މާއްދާ، ޖިނާއީ އިޖުރާއަތުގެ ޤާނޫނުގެ 59، 60 (ޅ)، 22 (ކ) އާއި ޤާނޫނުއަސާސީގެ 143 (ރ) ގައިވާ ސާބިޤާއަށް ތަބާވުމުގެ އުޞޫލާ ޚިލާފު އަމުރެއް ކަމަށެވެ. ރައްދުވި ފަރާތުން ބުނީ ތުހުމަތުތައް ތަފާތު ކަމަށާއި، ބަރުދަނާއި ގުޅުވާލެވޭ ހެކި ނެތް ކަމަށާއި، ތަކެތި ފެނުނީ ދުރުން ކަމަށެވެ.

މަސްތުވާތަކެތި ޓްރެފިކްކުރުމުގެ ތުހުމަތުގައި ބަންދުކޮށްފައިވާ މީހެއްގެ ބަންދު ދެވަނަ ފަހަރަށް އިތުރުކުރުމަށް ފުލުހުން އެދުމުން، ތުހުމަތުކުރެވޭ ކުށް ކަނޑައެޅިފައި ނެތުމާއި ބަރުދަން ނޭނގުމުގެ ސަބަބުން ޝަރުޠެއްނެތި ދޫކުރުމަށް މެޖިސްޓްރޭޓް ކޯޓުން ނެރުނު އަމުރަކީ ޤާނޫނާ އެއްގޮތް އަމުރެއްތޯ.

ދަށުކޯޓުގެ އަމުރު ބާޠިލު؛ ބަންދަށް އަލުން މެޖިސްޓްރޭޓް ކޯޓަށް އެދުމުގެ އިޚްތިޔާރު ފުލުހުންނަށް ދޫކޮށްލި

ފޯމުގައި ކުށްތައް ބަޔާންކޮށްފައިވާއިރު، ޖުމްލަ ގޮތެއްގައި ބަލާއިރު ތުހުމަތުކުރެވޭ މިންވަރަށް ހެކި ހުއްޓެވެ. ޓްރެފިކިންގއަކީ ޖިނާއީ ބޮޑު ކުށެއް ކަމާއި ކުރީގެ ރިކޯޑަށް ބަލާއިރު ދޫކުރުމަކީ މުޖުތަމަޢަށް ނުރައްކާތެރި ކަމެކެވެ. ވަގުތު ފާއިތުވެފައިވާތީ ބަންދަށް އަލުން އެދުމުގެ ފުރުޞަތު ފުލުހުންނަށް ދިނެވެ.