ޕްރޮސިކިއުޓަރ ޖެނެރަލް ވ. އާމިނަތު މަމްދޫޙާ

ކްރިމިނަލް ކޯޓުން ތުހުމަތުކުރެވޭ ފަރާތް އިތުރަށް ބަންދުގައި ބަހައްޓަން ނުފެންނަކަމަށް ކަނޑައަޅައި، ޖިނާއީ އިޖުރާއަތުގެ ޤާނޫނުގެ 66 ވަނަ މާއްދާގެ (ހ) ގެ ދަށުން ޝަރުޠުތަކާއެކު ދޫކޮށްލުމަށް ނިންމިއެވެ.

މަސްތުވާތަކެތި ބޭނުންކޮށް، ގެންގުޅެ، ވިޔަފާރިކުރާކަމަށް ތުހުމަތުކުރެވޭ މައްސަލައެއްގައި ކޯޓު އަމުރެއްގެ ދަށުން ތުހުމަތުކުރެވޭ ފަރާތް ދިރިއުޅޭ އެޕާޓްމަންޓް ބަލައިފާސްކުރުމުން ހެރޮއިން ކަމަށް ޝައްކުކުރެވޭ ތަކެތި (ވަގުތީ ބަރުދަނުގައި 23.805 ގްރާމް) އާއި ގިނަ އަދަދެއްގެ ފައިސާ ފެނިފައިވެއެވެ. ފުލުހުން 15 ދުވަހަށް ބަންދު އިތުރުކުރުމަށް އެދުނެވެ.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 22 (ޅ)، 59، 60 (ށ)، 63 ވަނަ މާއްދާތަކާއި، މަތީ ކޯޓުތަކުގެ ނިންމުންތަކަށް ތަބާވުމާބެހޭ ޤާނޫނުއަސާސީގެ 143 ވަނަ މާއްދާގެ (ރ) އާ ޚިލާފު އަމުރެއްކަމަށެވެ.

މަސްތުވާތަކެތި ބޭނުންކުރުމާއި ގެންގުޅުމާއި ވިޔަފާރިކުރުމުގެ ތުހުމަތުގައި ހައްޔަރުކުރެވުނު މީހަކު ޝަރުޠުތަކާއެކު ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 59 އަދި 60 ވަނަ މާއްދާތަކާއި ހައިކޯޓުގެ ސާބިތު އުޞޫލުތަކާ އެއްގޮތަށް ނެރުނު އަމުރެއްތޯ.

ކްރިމިނަލް ކޯޓުގެ އަމުރު ބާޠިލު؛ ބަންދާމެދު ގޮތެއް ނިންމުމަށް އަޞްލު މައްސަލަ ހުށަހެޅިފައިވާ ކޯޓަށް ހުށަހެޅުމަށް އަމުރުކުރި

ކުށުގެ ބާވަތާއި ލިބިފައިވާ ހެކި ޤަރީނާއަށް ބަލާއިރު ތުހުމަތުކުރެވޭ ފަރާތް ދޫވެފައި ހުރުމަކީ ޢަމަލު ތަކުރާރުކުރުމުގެ ފުރުޞަތު އޮންނަ ކަމެއްކަމާއި މުޖުތަމަޢުގެ ސަލާމަތަށް ނުރައްކަލެއް އޮތްކަމެއްކަމުން، ހައިކޯޓުގެ ކުރީގެ ނިންމުންތަކާއި 60 (ށ) އަށް ބަލާއިރު އަމުރަށް ބަދަލު ގެންނަންޖެހޭކަމަށް ހައިކޯޓަށް ފެނުނެވެ. މައްސަލަ މިހާރު ޝަރީޢަތަށް ހުށަހެޅިފައިވާތީ ބަންދާމެދު ގޮތެއް ނިންމުމަށް އަޞްލު މައްސަލަ ހުށަހެޅިފައިވާ ކޯޓަށް ފޮނުވިއެވެ.